Dhoma Vendore e Avokatisë Vlorë ka reaguar ashpër ndaj vendimit të Lorena Goxhobellit për transferimin e strukturave vendore të Kadastrës nga Vlora në Tiranë, duke e cilësuar atë si të papranueshëm, të njëanshëm dhe thellësisht të dëmshëm për qytetin, profesionistët e drejtësisë dhe qytetarët e qarkut të Vlorës.
Në një deklaratë publike, Dhoma e Avokatisë shprehet se ky vendim nuk përbën një rast të izoluar, por është vazhdim i një politike sistematike të zbrazjes institucionale të Vlorës.
Sipas saj, kjo prirje ka arritur kulmin me largimin e mëparshëm të Gjykatës Administrative dhe Gjykatës së Apelit, duke e lënë qytetin pa institucione kyçe të drejtësisë dhe duke e kthyer atë në një “periferi institucionale pa peshë” në hartën juridike të vendit.
Ndërkohë, vendimi që hyn në fuqi më 1 shkurt 2026, ia heq qytetit bregdetar shërbimet e menaxhimit të pronave, duke i përqendruar ato në kryeqytet.
Sipas dokumentit zyrtar, ky hap justifikohet me “përmirësimin e organizimit të punës” dhe “rritjen e eficiencës”. Por për qytetarët e Vlorës, ky vendim përkthehet në një tjetër goditje ndaj aksesit në shërbimet publike.
Në vend që të lehtësojë jetën e banorëve, vendimi i drejtueses së ASHK i detyron ata të udhëtojnë drejt Tiranës për çdo dokument pronësie, duke shtuar kostot dhe burokracinë.
Gjatë drejtimit të Lorena Goxhobellit, Agjencia Shtetërore e Kadastrës është përfshirë në një sërë skandalesh që lidhen me abuzime me pronat publike, legalizime të paligjshme dhe korrupsion të përhapur.
Dhoma e Avokatisë Vlorë shpreh indinjatën dhe kundërshtimin e saj të fortë ndaj vendimit të fundit për zhvendosjen e Agjencisë Shtetërore të Kadastrës nga qyteti i Vlorës drejt Tiranës, një vendim i papranueshëm, i njëanshëm dhe thellësisht i dëmshëm për qytetin, profesionistët e drejtësisë dhe qytetarët e këtij qarku.
Ky veprim nuk është një rast i izoluar, por vazhdim i një politike sistematike të zbrazjes institucionale të Vlorës, e cila ka arritur kulmin me largimin e Gjykatës Administrative dhe Gjykatës së Apelit, duke e shndërruar qytetin në një periferi institucionale pa peshë në hartën e drejtësisë shqiptare.
Largimi i institucioneve shtetërore nga Vlora përbën:
– Cenim të rëndë të aksesit në drejtësi dhe shërbime publike për mijëra qytetarë;
-Goditje direkte ndaj profesionit të avokatit, funksionimit të sistemit të drejtësisë dhe sigurisë juridike;
-Diskriminim territorial të hapur, që favorizon centralizimin ekstrem në Tiranë dhe braktis qytetet historike e strategjike të vendit.
Vlora, një qytet me peshë historike, juridike dhe kombëtare, nuk mund dhe nuk duhet të trajtohet si një qytet i dorës së dytë. Vendime të tilla, të marra pa konsultim me komunitetin juridik dhe pa asnjë analizë reale të pasojave, përbëjnë shkelje të parimeve të shtetit të së drejtës dhe decentralizimit administrativ.
Dhoma Vendore e Avokatisë Vlorë kërkon:
-Rishikimin e menjëhershëm dhe anulimin e vendimit për zhvendosjen e Agjencisë Shtetërore të Kadastrës;
-Ndërprerjen e politikës së largimit të institucioneve nga Vlora;
-Rikthimin e funksioneve gjyqësore dhe administrative, të domosdoshme për një qytet të këtij dimensioni dhe rëndësie.
Nëse kjo prirje vazhdon, Dhoma Vendore e Avokatisë Vlorë rezervon të drejtën të ndërmarrë çdo veprim institucional dhe ligjor, në bashkëpunim me aktorë të tjerë vendorë dhe kombëtarë, për të mbrojtur interesin publik dhe dinjitetin e qytetit të Vlorës.
Vlora nuk do të heshtë dhe nuk do të pranojë të zhvishet nga institucionet e saj.
