Guardia di Finanza (Policia Financiare Italiane) shkatërroi një rrjet shqiptar të trafikimit të kokainës, me seli në Foligno, nga Shqipëria në vendin fqinj dhe më gjerë.
Janë 7 persona të arrestuar, mes tyre 5 shqiptarë, një u vu në arrest shtëpiak dhe tre të tjerë rezultojnë ende në kërkim. U sekuestruan 68 kilogramë drogë e llojit kokainë dhe një makinë me fund të rremë. Lënda narkotike ishte e destinuar për tregun vendas, kryesisht restorante dhe lokale.
Mes të arrestuarve edhe një biznesmen shqiptar në Itali, që kishte në bashkëpronësi restorantin me një italian, gjithashtu të arrestuar kohë më parë. Operacioni është vijim nga hetimet e vitit 2024.
Por ajo që ra në sy ishte fakti se pakot e kokainës ishin të ambalazhuara me marka luksoze “Lacoste” dhe “Ferrari”.
“Pesë nga të dyshuarit janë shtetas me origjinë shqiptare, tre prej të cilëve banojnë në provincën e Perugia-s; njëri është italian dhe tjetri është me origjinë rumune, të dy prej të cilëve gjithashtu banojnë në provincë”, thanë autoritetet.
Për goditjen e organizatës u deshën survejime, përgjime, dekriptim të telefonave të koduar dhe deri vënia në punë e satelitëve për lokalizimin.
“Hetimi, i nisur në vitin 2024 nga Seksioni i Qeverisë së Azerbajxhanit i GICO-s së Njësisë së Policisë Ekonomike dhe Financiare – sipas një deklarate të nënshkruar nga Prokurori Raffaele Cantone – duke u nisur nga gjetjet hetimore të një çështjeje tjetër penale, u krye nëpërmjet përgjimeve telefonike dhe përgjimeve mjedisore, si dhe përdorimit të sistemeve të vendndodhjes satelitore. Këto, të kombinuara me shërbime më tradicionale të mbikëqyrjes, vëzhgimit dhe gjurmimit, kanë zbuluar prova serioze të funksionimit në zonën e Perugia-s të një skeme piramidale të udhëhequr nga një shtetas shqiptar, i cili koordinoi dhe menaxhoi prokurimin dhe shpërndarjen e sasive të konsiderueshme të narkotikëve (kokainës) në Umbria nga Shqipëria”, informon media e vendit fqinj.
Kryepromotori i rrjetit mbështetej në ndihmën e gruas së tij, një partnere në një biznes restorantesh në Foligno, si dhe të dy bashkëpunëtorëve të tjerë, një shqiptar dhe një italian. Besohej se biznesi përdorej thjesht si një “fasadë” për riinvestim të të ardhurave nga trafikimi i paligjshëm.
Individët nën hetim përdornin gjithashtu zakonisht sisteme mesazhesh të menjëhershme të disponueshme në internet (FaceTime, Snapchat , Signal/ etj.), radio “walkie-talkie” dhe teknologji të sofistikuar.
