Gjashtë shoqëri të lidhura me Sarah Ferguson, ish-dukesha e Jorkut dhe figurë e përmendur në skandalin Jeffrey Epstein së bashku me ish-bashkëshortin e saj, Prince Andrew, pritet të mbyllen dhe të çregjistrohen nga regjistri britanik i bizneseve.
Dokumentet e depozituara në Companies House konfirmojnë se Ferguson është drejtoresha e vetme e të gjashtë kompanive, të cilat operojnë në fusha si komunikimi dhe tregtia me pakicë. Disa prej tyre rezultojnë të klasifikuara si “joaktive”.
Ky zhvillim vjen pas publikimit të dokumenteve të reja lidhur me financuesin e dënuar për abuzime seksuale me të mitur, të cilat tregojnë se ish-dukesha e kishte kontaktuar vazhdimisht Epstein-in, madje edhe gjatë kohës që ai ndodhej në burg, për t’i kërkuar ndihmë në shlyerjen e borxheve që arrinin në rreth gjashtë milionë paund, si dhe këshilla për bizneset e saj në vështirësi.
Skandali Epstein duket se ka prekur gjithnjë e më shumë edhe familjarët e personave të përfshirë. Në qendër të vëmendjes kanë përfunduar edhe vajzat e princit Andrew dhe Sarah Ferguson, princeshat Beatrice, 37 vjeçe, dhe Eugenie, 35 vjeçe. Për javë të tëra, mediat kanë analizuar dokumentet e bëra publike nga United States Department of Justice, ku përmenden jo vetëm prindërit e tyre, por edhe emrat e dy motrave.
Një pjesë e dokumenteve prek edhe jetën private të Eugenie-s në rininë e saj. Beatrice dhe Eugenie kanë shmangur tradicionalisht një rol aktiv si përfaqësuese të Kurorës britanike, duke preferuar një profil më të ulët publik. Megjithatë, përmendja e tyre në këto dosje ka shkaktuar reagime të forta në tabloidët britanikë dhe brenda dinamikave familjare.
Vitin e kaluar, zëdhënësi i Ferguson-it kishte deklaruar se ajo kishte ndërprerë marrëdhëniet me Epstein-in sapo dolën në dritë akuzat serioze ndaj tij. Por dokumentet tregojnë një panoramë tjetër: sipas tyre, ajo jo vetëm që vijoi kontaktet, por e takoi atë në Miami pesë ditë pas lirimit të tij në vitin 2009, pasi kishte vuajtur 13 muaj nga një dënim 18-mujor për prostitucion me të mitura, i dhënë në vitin 2008.
Në atë kohë, Beatrice ishte 20 vjeçe dhe Eugenie 19. Sipas dokumenteve, më 27 korrik ato morën pjesë në një drekë me Epstein-in. Në një email, ai e pyeste Ferguson-in për vendndodhjen e saj; ajo i përgjigjej rreth një orë e gjysmë më vonë: Jam në Miami, do të jem tek ti në orën 12:30. Do të jemi unë, Beatrice dhe Eugenie. Të nesërmen, ajo konfirmoi takimin me Ghislaine Maxwell. Nga dokumentet rezulton gjithashtu se Epstein kishte paguar fluturimin për të treja drejt Shteteve të Bashkuara, me një kosto totale mbi 14 mijë dollarë.
Një muaj më vonë, Ferguson i shkruante Epstein-it për mundësitë dhe ofertat që kishte marrë për aktivitetet e saj: Pas drekës me ty, brenda një jave energjia u rrit ndjeshëm. Në një tjetër mesazh, ajo shprehej: Nuk jam ndier kurrë kaq e prekur nga mirësia e një miku, sidomos për komplimentin që u bëre vajzave të mia. Faleminderit Jeffrey, je vëllai që kam ëndërruar gjithmonë. Në vitin 2010, komunikimet vijonin me tone edhe më miqësore: Je një mit, i dashuri im. Nuk kam fjalë për bujarinë tënde. Jam në shërbimin tënd, më thuaj.
Në një email tjetër, dy muaj më pas, Ferguson përmendte jetën private të vajzës së saj më të vogël: “Po pres që Eugenie të kthehet nga një fundjavë pasioni”. Epstein kishte kërkuar më tej nëse mund t’i përshëndeste vajzat; ajo ishte përgjigjur: Beatrice është në Londër me të atin, Eugenie është larg me një djalë simpatik. Në disa shkëmbime, ajo kishte ndarë edhe fotografi të dy vajzave.
Deri tani, Beatrice dhe Eugenie nuk kanë komentuar mbi këtë korrespondencë. Sipas ekspertes së familjes mbretërore Ingrid Seward, e cituar nga CNN, zbulimet i kanë “tronditur thellësisht” ato.
