Administrata e Donald Trump po planifikon ndërtimin e një baze ushtarake për 5 mijë persona në Gaza, në një sipërfaqe më shumë se 350 hektarë.
Objekti parashikohet të funksionojë si bazë operative ushtarake për një Forcë Ndërkombëtare Stabilizimi (ISF), e cila pritet të jetë një trupë shumëkombëshe ushtarake e përbërë nga forca të premtuara nga vende të ndryshme. ISF është pjesë e Bordit të Paqes, i krijuar së fundmi dhe i cili synon të qeverisë Gaza-n. Bordi i Paqes drejtohet nga Donald Trump, ndërsa një rol udhëheqës ka edhe dhëndri i tij, Jared Kushner.
Dokumentet e rishikuara nga Guardian parashikojnë ndërtimin e një poste ushtarake në faza, e cila në përfundim do të ketë dimensione 1 mijë e 400 metra me 1 mijë e 100 metra. Përreth saj do të vendosen 26 kulla vëzhgimi të blinduara në rimorkio, një poligon për armë të vogla, bunkere dhe një magazinë për pajisje ushtarake. E gjithë baza do të rrethohet me tela me gjemba.
Forta do të ndërtohet në një zonë të thatë dhe të sheshtë në jug të Gazës, të mbuluar me kripë dhe shkurre të bardha, si dhe të mbeturina metali të deformuara nga bombardimet izraelite gjatë viteve. Guardian ka shqyrtuar video të zonës, ndërsa një burim i afërt me planet i tha Guardian se një grup i vogël kompanish ndërkombëtare ndërtimi me përvojë në zona lufte ka vizituar tashmë vendin.
Sipas raportimeve, qeveria indoneziane ka ofruar dërgimin e deri në 8 mijë trupave. Presidenti i Indonezisë ishte një nga katër liderët e Azisë Juglindore që do të merrnin pjesë në një takim të parë të Bordit të Paqes në Uashington të enjten.
Këshilli i Sigurimit i OKB-së ka autorizuar Bordit të Paqes të krijojë një Forcë Ndërkombëtare Stabilizimi të përkohshme në Gaza. Sipas OKB-së, ISF do të ketë detyrë të sigurojë kufirin e Gazës, të mbajë paqen brenda territorit, të mbrojë civilët dhe të trajnojë dhe mbështesë “forcat e policisë palestineze të verifikuara”.
Nuk është e qartë se cilat do të jenë rregullat e angazhimit të ISF-së në rast përleshjesh, bombardimesh të reja nga Izraeli, apo sulmesh nga Hamas. Po ashtu, nuk është e qartë se çfarë roli do të ketë ISF në çarmatimin e Hamasit, një kusht i Izraelit për rindërtimin e Gazës.
Më shumë se 20 vende janë bërë pjesë e Bordit të Paqes, por pjesa tjetër e botës ka qëndruar larg. Edhe pse është themeluar me miratimin e OKB-së, statuti i organizatës duket se i jep Trump-it drejtim dhe kontroll të përhershëm.
“Bordi i Paqes është një lloj trillimi ligjor, me personalitet ndërkombëtar nominal të veçantë nga OKB dhe SHBA, por në realitet është vetëm një mbulesë për përdorim të Shteteve të Bashkuara”, tha Adil Haque, profesor i së drejtës në Universitetin Rutgers.
Ekspertët thonë se struktura e financimit dhe e qeverisjes është e paqartë, dhe disa kontraktorë kanë thënë për Guardian se bisedat me zyrtarët amerikanë shpesh zhvillohen në Signal dhe jo përmes emailit qeveritar.
Dokumenti i kontraktimit të bazës ushtarake është lëshuar nga Bordi i Paqes dhe është përgatitur me ndihmën e zyrtarëve amerikanë të kontraktimeve. Plani përfshin një rrjet bunkeresh secili me dimensione 6 metra me 4 metra dhe lartësi 2.5 metra, me sisteme ventilimi ku ushtarët mund të mbrohen.
Sipas dokumentit, kontraktori duhet të kryejë “një sondazh gjeofizik të vendit për të identifikuar çdo zbrazëti nëntokësore, tunele ose kavitet të mëdhenj për çdo fazë”. Kjo duket se i referohet rrjetit të madh të tuneleve që Hamas ka ndërtuar në Gaza.
Një pjesë e dokumentit përshkruan një “Protokoll për Trupa Njerëzore”. “Nëse zbulohet trup njerëzor i dyshuar ose artefakte kulturore, të gjitha punët në zonën përreth duhet të ndalen menjëherë, zona duhet të sigurohet, dhe Oficeri i Kontraktimit duhet njoftuar për udhëzim”, thuhet aty. Sipas Agjencisë së Mbrojtjes Civile të Gazës, trupat e rreth 10 mijë palestinezëve besohet të jenë varrosur nën rrënoja.
Nuk është e qartë se kush është pronari i tokës ku do të ndërtohet kompleksi ushtarak, por shumica e jugut të Gazës është aktualisht nën kontroll izraelit. OKB vlerëson se të paktën 1.9 milion palestinezë janë zhvendosur gjatë luftës.
Diana Buttu, avokate palestinezo-kanadeze dhe ish-negociatore e paqes, e cilësoi ndërtimin e një baze ushtarake mbi tokë palestineze pa miratimin e qeverisë si akt pushtimi. “Kush u ka dhënë leje për të ndërtuar këtë bazë ushtarake?”, pyeti ajo.
Zyrtarët e US Central Command i referuan të gjitha pyetjet për bazën ushtarake tek Bordi i Paqes.
Një zyrtar i administratës Trump refuzoi të diskutonte kontratën për bazën ushtarake: Siç ka thënë presidenti, nuk do të ketë trupa amerikane në terren. Nuk do të diskutojmë dokumente të rrjedhura.
