Treguesi i Ndjesisë Ekonomike shënoi një rënie të mëtejshme edhe në muajin shkurt 2026, duke reflektuar një ngadalësim të lehtë të klimës së besimit në ekonomi. Sipas “Vrojtimit të Besimit të Biznesit dhe të Konsumatorit” të publikuar nga Banka e Shqipërisë, TNE zbriti në 107.6 pikë, me një rënie prej 2.5 pikësh krahasuar me janarin, por vijon të qëndrojë 7.6 pikë mbi mesataren historike.
Rënia e muajit shkurt u përcaktua kryesisht nga përkeqësimi i besimit në sektorët e ndërtimit, shërbimeve dhe tregtisë, ndërsa industria dha sinjale pozitive, duke regjistruar rritje të treguesit të besimit. Besimi i konsumatorëve mbeti pothuajse i pandryshuar.
Treguesi i Besimit në Industri (TBI) u rrit me 1.5 pikë përqindje në shkurt. Sipas të dhënave të detajuara, përmirësimi lidhet me vlerësime më optimiste për kontratat porositëse, si në total ashtu edhe për eksportet. Kontratat porositëse nga eksportet shënuan një përmirësim të dukshëm krahasuar me muajt e mëparshëm, ndërsa pritjet për prodhimin dhe punësimin në të ardhmen janë gjithashtu në rritje.
Niveli i TBI-së qëndron rreth 10 pikë përqindje mbi mesataren historike, duke konfirmuar se industria mbetet një nga sektorët më rezistentë në këtë fazë të ciklit ekonomik.
Në kah të kundërt, sektori i ndërtimit pësoi goditjen më të fortë mujore. Treguesi i Besimit në Ndërtim (TBN) ra me 6.5 pikë përqindje në shkurt. Rënia u ndikua si nga vlerësimet për aktivitetin ndërtues gjatë muajve të fundit, ashtu edhe nga porositë aktuale.
Megjithatë, edhe pas kësaj rënieje, niveli i TBN-së qëndron rreth 12 pikë përqindje mbi mesataren afatgjatë, çka tregon se sektori vijon të operojë në territor pozitiv, por me sinjale ngadalësimi. Pritjet për çmimet në të ardhmen në këtë sektor janë në rritje, duke reflektuar presione të mundshme kostosh.
Treguesi i Besimit në Shërbime (TBSH) u tkurr me 1.9 pikë përqindje. Si ecuria aktuale e aktivitetit ashtu edhe niveli i kërkesës kanë shënuar rënie mujore. Megjithatë, edhe ky sektor mbetet rreth 12 pikë përqindje mbi mesataren historike.
Edhe tregtia regjistroi rënie, me Treguesin e Besimit në Tregti (TBT) që u tkurr me 3.6 pikë përqindje. Kontributi negativ lidhet kryesisht me pritjet më pak optimiste për punësimin në të ardhmen, ndërsa ecuria e biznesit ka dhënë gjithashtu një ndikim rënës, por më të moderuar. Pavarësisht rënies mujore, TBT mbetet rreth 10 pikë përqindje mbi mesataren historike.
Treguesi i Besimit Konsumator (TBK) mbeti pothuajse i pandryshuar në krahasim me janarin, duke qëndruar rreth 1.1 pikë përqindje mbi mesataren historike. Konsumatorët kanë ulur disi pritjet për gjendjen e tyre financiare personale, ndërsa kanë përmirësuar pritjet për situatën ekonomike në të ardhmen.
Interesant është fakti se pritjet për nivelin e përgjithshëm të çmimeve dhe për papunësinë në 12 muajt e ardhshëm janë rishikuar në rënie, çka mund të përkthehet në një perceptim më të moderuar të presioneve inflacioniste dhe të rrezikut në tregun e punës.
Blerjet e mëdha mbeten në territor negativ, si në vlerësimin aktual ashtu edhe në pritje, duke reflektuar një kujdes të vazhdueshëm të familjeve për shpenzimet e rëndësishme.
Vrojtimi i besimit mbetet një nga instrumentet kryesore për të matur pritjet dhe perceptimet e aktorëve ekonomikë, duke shërbyer si një barometër i hershëm i ciklit ekonomik në vend. /ekofin.al
