Deputetja e Partisë Demokratike, Jorida Tabaku, nga Kuvendi reagoi ndaj ofendimeve të Taulant Ballës ndaj deputetes së PD-së, Albana Vokshi.
Tabaku u shpreh se akti përbën një cenim të rëndë të dinjitetit të një gruaje dhe nënëje, duke kërkuar masa të menjëhershme: dënim publik të ofendimit, kërkesë ndjesë për deputeten Vokshi dhe veprime konkrete nga kryetari i Kuvendit, që të mos lejohet normalizimi i një gjuhë të tillë brenda foltores parlamentare.
Fjala e saj:
Zonja Vokshi është nënë në radhë të parë. A donte dikush nga ju që fëmijët tuaj të dëgjonin atë shprehje? Unë nuk do ta doja. I bëj thirrje kolegëve socialiste, së pari të mos ndahemi politikisht për këtë çështje. Të lëmë politikën mënjanë dhe të mbështesim një zonjë që është ofenduar.
Së dyti, i bëj thirrje kolegëve të Komisionit të Jashtëm, drejtuar këtu dhe kryetarit, zoti Hasani. Zëvendëskryetarja e tij është ofenduar. Ju bëj thirrje, kryetar, që së pari të dënoni aktin. E më pas, të kërkohet ndjesë ashtu siç i meriton zonja. Jo të justifikohet me një sjellje që, në gjykimin tonë, edhe e përshkallëzoi akoma dhe më shumë ofendimin.
Zoti Peleshi, në raste të tjera për opozitën ju keni marrë masa të menjëhershme aty. I keni përjashtuar nga salla. Kanë dalë deputetë nga salla. Merrni këtë masë që kolega të kërkojë ndjesë, që kolegja Vokshi, këtu së pari, kur të kthehet në shtëpi, tek vajzat, të mos t’i thonë: pse u tha ajo shprehje. Kush do ta donte këtë në familjet tuaja? Kush do ta donte? Kush do e pranonte këtë sjellje?
