Zgjerimi duhet “të mbetet i bazuar në meritë, por në kontekstin aktual ne duhet të përshpejtojmë ritmin”, tha Kaja Kallas në një konferencë vjetore të diplomatëve të BE-së në Bruksel. “Zgjerimi është antidoti ndaj imperializmit rus dhe një shenjë se projekti më ambicioz shumëpalësh në histori, Bashkimi Evropian, është këtu për të qëndruar.”
Përpjekja e Kallas për integrim më të shpejtë të vendeve kandidate për në BE vjen mes diskutimeve të tensionuara midis Komisionit Evropian, i cili mbështet zgjerimin e shpejtë, dhe kryeqyteteve kombëtare që kanë mbështetur një qasje më graduale.
Në një darkë javën e kaluar, ku mori pjesë edhe shefi i stafit të presidentit të Komisionit Evropian, Bjoern Seibert, ambasadorët e BE-së hodhën poshtë mundësinë e lejimit të anëtarëve të rinj me privilegje të kufizuara.
Fjalët e Kallas ofrojnë mbështetje të fortë për idenë se zgjerimi nuk është thjesht një proces burokratik me anë të të cilit kandidatët plotësojnë kriteret e BE-së, por një zgjedhje gjeopolitike – siç ka sugjeruar Presidentja e Komisionit Ursula von der Leyen.
“Zgjerimi është përshkruar si politika e jashtme më e suksesshme e unionit, duke zgjeruar zonën e stabilitetit, paqes dhe prosperitetit”, tha Kallas, duke cituar të dhënat e Eurobarometrit që tregojnë mbështetje të gjerë për zgjerimin e bllokut me 27 anëtarë.
