Një nismë gjermane për të taksuar pijet me sheqer dhe për të ndaluar pijet energjike për personat nën 16 vjeç do të votohet të premten nga asambleja e shteteve rajonale të vendit, ndërsa po rritet mbështetja publike dhe ndërpartiake për masa më të ashpra ndaj obezitetit dhe sëmundjeve të lidhura me të.
Propozimi nuk përcakton saktësisht se si duhet të dizajnohet taksa, por propozon që të ardhurat e mbledhura të përdoren për nisma shëndetësore.
“Prodhuesit duhet të kenë një nxitje për të rishikuar recetat e tyre dhe për të ulur përmbajtjen e sheqerit. Deri më tani ata nuk kanë pasur një nxitje të tillë”, tha Daniel Guenther, kryeministër i shtetit të Schleswig-Holstein dhe iniciator i propozimit legjislativ.
Propozimi gjithashtu kërkon ndalimin e shitjes së pijeve energjike për fëmijët nën 16 vjeç për shkak të përmbajtjes së lartë të kafeinës, taurines dhe sheqerit në këto pije.
“Pijet energjike nuk janë pije të padëmshme dhe në modë. Ato mund të bëhen një barrë e vërtetë, veçanërisht për të rinjtë”, u shpreh ai.
Më shumë se 100 u vendosin taksa pijeve me sheqer, thotë Organizata Botërore e Shëndetësisë, duke përfshirë rreth gjysmën e shteteve anëtare të Bashkimit Evropian, si Belgjika, Franca dhe Portugalia.
BE-ja nuk ka një taksë në të gjithë bllokun, duke ia lënë masa të tilla qeverive kombëtare.
