Autoritetet në Mbretërinë e Bashkuar kanë rritur nivelin e alarmit nga terrorizmi nga “i mesëm në të lartë” në “të rëndë”, pas sulmit me thika të ndodhur në zonën e Golders Green në Londër. Vendimi është marrë nga Qendra e Përbashkët e Analizës së Terrorizmit (JTAC), e cila vlerëson në mënyrë të pavarur rrezikun e sulmeve terroriste në vend.
Sipas qeverisë britanike, niveli i ri do të thotë se një sulm terrorist konsiderohet “shumë i mundshëm” brenda gjashtë muajve të ardhshëm. Policia kundër terrorizmit e ka cilësuar ngjarjen në Golders Green si një incident terrorist, duke konfirmuar natyrën e sulmit.
Ministrja e Brendshme, Shabana Mahmood, deklaroi se rritja e nivelit të kërcënimit nuk lidhet vetëm me këtë ngjarje, por është rezultat i një rritjeje të përgjithshme të rrezikut nga ekstremizmi islamist dhe grupet e ekstremit të djathtë që veprojnë në Mbretërinë e Bashkuar. Sipas saj, po rriten gjithashtu edhe kërcënimet e lidhura me aktorë shtetërorë që nxisin akte dhune, përfshirë ndaj komunitetit hebre.
Qeveria britanike ka njoftuar gjithashtu shtim të fondeve për sigurinë e sinagogave, shkollave dhe qendrave komunitare, ndërsa Mahmood theksoi se do të ndërmerren të gjitha masat për të luftuar antisemitizmin. Ajo u bëri thirrje qytetarëve të jenë vigjilentë dhe të raportojnë çdo shqetësim te policia.
Nga ana tjetër, kryetari i bashkisë së Londrës, Sadiq Khan, u shpreh se autoritetet po marrin të gjitha masat e nevojshme për të garantuar sigurinë e qytetit. Ai deklaroi se shërbimet e emergjencës janë në gatishmëri të plotë dhe se do të ketë prani të shtuar të policisë në rrugët e Londrës, përfshirë edhe oficerë të armatosur, në ditët në vijim.
