Wayne Rooney ka reaguar ashpër ndaj mundësisë që Trent Alexander-Arnold të mbetet jashtë listës së Thomas Tuchel për Kupën e Botës 2026. Me vetëm pesë javë të mbetura deri në nisjen e garës më 11 qershor, tekniku gjerman po analizon çdo alternativë për të ndërtuar skuadrën më konkurruese të mundshme për Anglinë.
“Tre Luanët” do ta nisin aventurën në Grupin L ndaj Kroacisë më 17 qershor, përpara sfidave kundër Ganës më 23 qershor dhe Panamasë më 27 qershor. Debatet më të mëdha te tifozët anglezë vazhdojnë të jenë në repartin defensiv, ku emri i Alexander-Arnold mbetet një nga temat më të diskutuara.
Duke folur në podcastin e tij, Rooney e bëri të qartë se nuk e kupton se si mbrojtësi i Arsenalit, Ben White, mund të preferohet para ish-yllit të Liverpoolit. “Pa asnjë mungesë respekti për Ben White – mendoj se është një lojtar fantastik – por që ai të jetë në skuadër dhe të luajë para Trentit është e pakuptimtë”, deklaroi Rooney.
Ai gjithashtu mbështeti Luke Shaw për të mbuluar krahun tjetër të mbrojtjes, duke besuar se përvoja dhe cilësia e tij mund të jenë vendimtare për Anglinë në turne. Vendimi final i Tuchel pritet me shumë interesim, pasi çdo përzgjedhje në mbrojtje mund të shkaktojë reagime të mëdha në opinionin sportiv anglez.
