Përzgjedhësi i Suedisë, Graham Potter, ka vlerësuar lart bashkëpunimin mes sulmuesve Alexander Isak dhe Viktor Gyokeres pas fitores bindëse 5-1 ndaj Tunizisë në ndeshjen hapëse të Grupit F në Kupën e Botës 2026.
Yasin Ayari realizoi dy gola, ndërsa Mattias Svanberg shtoi një tjetër pas hyrjes nga stoli, por vëmendjen kryesore e mori dyshja Isak-Gyökeres, të cilët dominuan mbrojtjen tuniziane gjatë gjithë takimit.
Të dy sulmuesit gjetën rrugën e rrjetës dhe krijuan vazhdimisht raste të rrezikshme, duke qenë faktorët kryesorë në suksesin e suedezëve.
“Individualisht janë futbollistë të nivelit të lartë, por së bashku mund të jenë një kërcënim i vërtetë për çdo kundërshtar. Besoj se do të bëhen edhe më të fortë sa më shumë që të luajnë bashkë, sepse plotësojnë njëri-tjetrin në mënyrë të shkëlqyer”, deklaroi Potter pas ndeshjes.
Trajneri suedez shprehu kënaqësinë për paraqitjen e ekipit, duke theksuar se cilësia individuale e lojtarëve në repartin ofensiv kishte nevojë të mbështetej nga funksionimi i të gjithë skuadrës.
“Jam shumë i kënaqur me lojtarët. E dimë cilësinë që kemi në fazën sulmuese, por ishte e rëndësishme që skuadra të funksiononte si një e tërë. Nuk ishim perfektë dhe e dinim se nuk do të ishim, por në fillim të ndeshjes kontrolluam lojën mjaft mirë”, tha ai.
Kjo ishte përballja e parë mes Suedisë dhe Tunizisë në historinë e Kupës së Botës. Për tunizianët, humbja ishte veçanërisht e rëndë, pasi gjatë kualifikimeve nuk kishin pësuar asnjë gol. Megjithatë, kjo ishte ndeshja e dytë radhazi ku ata pranuan pesë gola, pas humbjes 5-0 ndaj Belgjikës në një miqësore para turneut.
Pas barazimit 2-2 mes Holandës dhe Japonisë, Suedia kryeson Grupin F me tri pikë. Në sfidën e ardhshme, suedezët do të përballen me Holandën më 20 qershor në Houston.
“E dimë se ndeshja e ardhshme do të jetë kundër një skuadre të madhe dhe duhet të jemi gati për atë sfidë”, përfundoi Potter.
