Ish-sulmuesi italian Igor Protti ka ndërruar jetë në moshën 58-vjeçare, pasi luftonte prej kohësh me kancerin e zorrës së trashë.
Lajmi u bë publik nga familja e tij përmes një mesazhi të ndarë në rrjetet sociale.
Në njoftim, familja publikoi edhe një mesazh lamtumire të lënë nga Protti, ku ai e përshkruante jetën e tij si një “ndeshje që ka arritur në fishkëllimën e fundit” dhe falënderonte familjen, miqtë dhe tifozët për mbështetjen gjatë karrierës së tij.
Igor Protti ishte një emër i njohur i futbollit italian, sidomos për periudhën e tij te Bari dhe Livorno, ndërsa kishte luajtur edhe për ekipe si Lazio dhe Napoli. Ai u kujtua nga tifozët si një sulmues luftarak dhe i dashur për publikun.
Sipas mesazhit të familjes, ceremonia e homazheve do të zhvillohet në sallën e varrimit Frongillo në Cecina, duke filluar nga ora 15:00.
Protti kishte folur më herët publikisht për sëmundjen e tij, duke e krahasuar atë me një “ndeshje të vështirë” që duhej përballuar me vendosmëri, një reflektim që e kishte ndjekur deri në paraqitjen e tij të fundit publike në fund të majit, në dasmën e vajzës së tij.
