Gjysmëfinalja e Kupës së Botës 2026 mes Argjentinës dhe Anglisë vazhdon të shkaktojë debat edhe pas përfundimit të saj. Gazeta prestigjioze britanike ‘The Telegraph’ ka publikuar një analizë të detajuar me titull “30 truket e pista”, ku pretendon se Argjentina përdori një sërë manovrash për të destabilizuar kundërshtarin gjatë fitores 2-1.
Sipas mediumit britanik, skuadra e drejtuar nga Lionel Scaloni iu përmbajt reputacionit të saj për futboll të ashpër dhe lojë psikologjike, duke përdorur ndërhyrje të forta, vonesa në rifillimin e lojës, përplasje jashtë aksionit dhe protesta të vazhdueshme ndaj gjyqtarit.
“The Telegraph” shkruan se që në minutat e para të sfidës lojtarët argjentinas ushtruan presion fizik ndaj futbollistëve anglezë, ndërsa në disa raste tentuan të provokonin reagime që mund të ndëshkoheshin me kartonë.
Analiza përshkruan episode të shumta gjatë 90 minutave, ku përmenden ndërhyrje të Alexis Mac Allister, Enzo Fernandez, Leandro Paredes, Giuliano Simeone, Cristian Romero, Nahuel Molina dhe Lionel Messi, si dhe përplasje të vazhdueshme me futbollistët anglezë.
Sipas gazetës britanike, një tjetër moment i diskutueshëm ishte edhe ndërprerja e një rivënieje anësore në fundin e pjesës së parë, pasi një top i hedhur nga stoli i Argjentinës hyri në fushën e lojës.
Në analizë përmenden gjithashtu protestat e vazhdueshme të lojtarëve argjentinas ndaj arbitrit, përplasjet mes futbollistëve gjatë dhe pas ndeshjes, si edhe festimet provokuese pas golit të barazimit dhe pas fërshëllimës përfundimtare.
Në fund, ‘The Telegraph’ ndalet edhe te festa e Argjentinës pas kualifikimit në finale, ku disa lojtarë shfaqën një banderolë me mbishkrimin “Falklandet (Malvines) janë argjentinase”. Sipas medias britanike, FIFA kishte ndaluar më herët shfaqjen e flamujve apo banderolave me mesazhe politike brenda stadiumit, ndërsa mbetet për t’u parë nëse organi qeverisës i futbollit botëror do të ndërmarrë ndonjë masë disiplinore, teksa po e heton çështjen.
Megjithatë, bëhet fjalë për pretendime dhe interpretim të gazetës britanike, ndërsa nuk ka pasur një reagim zyrtar nga FIFA apo Federata Argjentinase e Futbollit lidhur me këto akuza.
Rastet e evidentuara nga ‘The Telegraph’.
1’: Alexis Mac Allister ndërhyn me vonesë ndaj Anderson.
2’: Leandro Paredes shtyn Jude Bellingham.
3’: Enzo Fernandez vonohet në ndërhyrje ndaj Anderson.
6’: Giuliano Simeone e godet Anderson nga prapa në këmbë.
11’: Enzo Fernandez i shpëton ndëshkimit pas një tjetër faulli ndaj Elliott.
11’: Faull i qëllimshëm ndaj Rogers, i cili rrëzohet.
13’: Simeone tenton të godasë Jordan Pickford me shqelm.
15’: Bellingham mbetet i shtrirë pas një ndërhyrjeje të Paredes dhe më pas ofendohet.
16’: Simeone rrëzon Gordon dhe më pas e godet me përçmim në kokë.
24’: Simeone paralajmërohet nga arbitri pasi pengon Jordan Pickford, por e përsërit të njëjtin veprim në goditjen nga këndi dhe bën faull.
28’: Mac Allister ndërhyn me vonesë ndaj James.
31’: Enzo Fernandez bën faull ndaj Bellingham.
33’: Guehi fiton duelin me Simeonen, i cili përpiqet ta ndalë duke e goditur me kokë.
34’: Nahuel Molina përplaset nga pas me Bellingham.
36’: Lionel Messi ndalet me faull nga Anderson, i cili ndëshkohet me kartonin e parë të verdhë të ndeshjes. Gjatë rënies, Messi i jep një shqelm të lehtë Spence.
37’: Mac Allister dhe Paredes kërkojnë karton të kuq për Anderson pas ndërhyrjes ndaj Messit.
41’: Lisandro Martinez ndëshkohet me karton të verdhë për një faull ndaj Rogers.
45’: James tenton të ekzekutojë shpejt një rivënie anësore, por stoli i Argjentinës hedh një top tjetër në fushë.
45+2’: Paredes ndërhyn me këmbën lart ndaj Anderson.
Fundi i pjesës së parë: Messi dhe Enzo Fernandez rrethojnë arbitrin duke protestuar.
48’: Messi e shtyn Bellingham jashtë vijave të fushës.
51’: Cristian Romero ndëshkohet me karton të verdhë pasi rrëzon Bellingham.
53’: Simeone godet Spence në fytyrë, por nuk ndëshkohet me karton.
58’: Pickford del për të kontrolluar topin, ndërsa Cristian Romero qëndron në këmbë, në vend që të shmanget.
73’: Messi shtyn Spence.
85’: Cristian Romero feston golin duke bërtitur në fytyrën e Pickford, i cili ishte i shtrirë në tokë.
88’: Stones goditet në kokë, ndërsa lojtarët e Argjentinës protestojnë.
90+2’: Gonzalo Montiel i drejton fjalë provokuese Bellingham.
90+7’: Emiliano “Dibu” Martínez humb qëllimisht kohë dhe buzëqesh.
Pas përfundimit të ndeshjes: Lojtarët e Anglisë, të cilët ishin përmbajtur gjatë gjithë takimit, reagojnë ndaj festimeve të zjarrta të Argjentinës.
