Me 14 gusht kanë ndodhur ngjarje të rëndësishme që kanë lënë gjurmë në histori: nga lindja e Dok Hollideit në vitin 1851 dhe përfundimi i Luftës së Dytë Botërore në vitin 1945, deri te ngjarje të tjera që kanë ndryshuar rrjedhën e historisë.
1751: Meri Blendi helmon të atin
Frensis Blendi nga Henli-on-Temz në Angli bie në koma dhe vdes pasi vajza e tij, Meri, e helmon me arsenik. Frensis nuk e kishte miratuar lidhjen e Merit me Uilliam Krenstounin, një burrë i martuar nga Skocia. Meri pretendoi se besonte që arseniku ishte një ilaç dashurie që do t’ia ndryshonte mendjen të atit. Ajo u shpall fajtore për vrasjen e të atit dhe u var për vrasje në vitin 1752.
1851: Rusët vendosen në Alaskë
Eksploruesi rus Grigori Shelekhov themelon vendbanimin e parë të përhershëm të Rusisë në Alaskë, në Gjirin e Tre Shenjtorëve.
1851: Lind Dok Hollidei
Dok Hollidei, bixhozxhiu dhe pistolieri amerikan, lind me emrin Xhon Henri Hollidei në Grifin të Xhorxhias. Ai njihet veçanërisht për miqësinë e ngushtë me marshallin amerikan UajtErp, të cilin e ndihmoi gjatë përleshjes së famshme me armë në O.K. Corral, në qytetin Tombstoun të Arizonës, në vitin 1881.
Më herët, Hollidei kishte punuar si dentist në Xhorxhia, por pasi u diagnostikua me tuberkuloz, u zhvendos në Perëndim me shpresën se klima më e thatë do t’ia lehtësonte simptomat. Megjithatë, vetëm gjashtë vjet pas përleshjes në O.K. Corral, Hollidei vdiq nga tuberkulozi në Kolorado.
1880: Përfundon ndërtimi i Katedrales së Këlnit
Pas më shumë se 600 vjetësh ndërtimi, përfundon më në fund Katedralja e Këlnit në Gjermani. Ndërtesa, 157 metra e lartë, është kisha me dy kulla më e lartë në botë, si dhe kisha gotike më e madhe në Europën Veriore.
Ndërtimi kishte nisur fillimisht në vitin 1248 dhe vazhdoi me ndërprerje deri në shekullin XVI, kur u ndal plotësisht. Për 400 vjet, një vinç i madh mesjetar dominonte horizontin e Këlnit, ndërsa ndërtesa mbeti e papërfunduar. Por në vitet 1800 u zbulua plani origjinal i fasadës së kishës dhe ndërtimi rifilloi përfundimisht në vitin 1842.
1900: Kryengritja e Boksierëve shtypet
Forcat europiane, amerikane dhe japoneze pushtojnë Pekinin për të shtypur Kryengritjen e Boksierëve. Ajo ishte një kryengritje kundër të huajve, e zhvilluar nga të ashtuquajturit “boksierë”, fshatarë kinezë, shumë prej të cilëve kishin përvojë në artet marciale. Në atë kohë, misionarët perëndimorë ishin përhapur në Kinë dhe po përhapnin krishterimin. Kina kishte humbur Luftën Kino-Japoneze pesë vjet më parë dhe shumë kinezë të zakonshëm shqetësoheshin se ndërhyrja e huaj do të përfundonte duke marrë nën kontroll qeverinë Qing.
Boksierët e nisën kryengritjen duke sulmuar misionarët në të gjithë vendin. Pamundësia e qeverisë kineze për t’i kontrolluar ata çoi në ndërhyrje të drejtpërdrejtë ushtarake nga fuqitë e huaja. Në total, deri në 300 000 boksierë luftuan kundër rreth 225 000 forcave europiane, amerikane dhe japoneze. Konflikti përfundoi me humbjen e boksierëve dhe solli dobësimin e rëndë të qeverisë kineze.
1945: Përfundon Lufta e Dytë Botërore
Pas hedhjes së bombave atomike mbi Hiroshimë dhe Nagasaki, Japonia shpall dorëzimin pa kushte ndaj Aleatëve. Dorëzimi, i përkujtuar si Dita e Fitores ndaj Japonisë (V-J Day), shënoi fundin e Luftës së Dytë Botërore. Lufta gjashtëvjeçare mes fuqive të Boshtit, Gjermanisë, Italisë dhe Japonisë, dhe Aleatëve, Francës, Britanisë së Madhe, Shteteve të Bashkuara dhe Bashkimit Sovjetik, shkaktoi të paktën 50 milionë viktima, duke e bërë atë konfliktin më të përgjakshëm në historinë e botës.
