Avokati Tomë Gashi ka reaguar përmes një postimi në Facebook, duke e lidhur vizitën e tij në Gjirokastër me qëndrimet e kryeministrit shqiptar, Edi Rama, ndaj themelimit të Gjykatës Speciale në Kosovë.
Në postimin e tij, Gashi shkruan se ndodhet sot në Gjirokastër, ashtu si edhe Edi Rama. Kjo, sipas tij, i ka rikthyer në kujtesë një periudhë kur Rama kishte ardhur në Prishtinë për të bindur Hashim Thaçin, Isa Mustafën dhe deputetët e Kuvendit të Kosovës që të votonin themelimin e Gjykatës Speciale.
Sipas Gashit, Rama nuk kishte arritur t’i bindte Albin Kurtin, Lëvizjen Vetëvendosje dhe disa deputetë të tjerë.
Postim i plotë:
Gjirokastra & Gjykata Speciale!
Unë sot në Gjirokastër.
Edi Rama sot në Gjirokastër.
Si për sherr, m’u kujtua kur pat ardhë Edi në Prishtinë me bind Hashim Thaçin, Isa Mustafën dhe deputetët e Kosovës me votu Gjykatën Speciale.
Albin Kurtin dhe Lëvizjen Vetëvendosje, si dhe disa deputetë, nuk arriti t’i bindë.
Tani, unë nuk besoj që Edi Rama është i lumtur që ndihmoi paksa si shumë për ta vënë nën akuzë luftën çlirimtare, duke i dërguar në burg udhëheqësit e UÇK-së.
Unë nuk besoj që dikush është i lumtur që, me votat e 82 deputetëve, më 2 gusht 2016, u votua Gjykata raciste, antikombëtare.
Ata që votuan këtë Gjykatë duhet ta dinë se e kanë cenuar Republikën e Kosovës, e kanë cenuar sovranitetin e Kosovës, e kanë njollosur UÇK-në.
Dhe ata drejtësinë e kthyen në ndëshkim të luftës për çlirimin tonë.
