Këngëtari britanik Ed Sheeran ka humbur më shumë se 200 mijë ndjekës në Instagram brenda 24 orëve, pas kritikave që pasuan largimin e reperit Macklemore nga pjesa e mbetur e turneut të tij në SHBA.
Macklemore ishte planifikuar të performonte si artist hapës në tetë nga dhjetë koncertet e fundit të Sheeran, por të martën u njoftua se nuk do të ishte më pjesë e turneut, pas një fjalimi të tij në mbështetje të palestinezëve.
Pas këtij zhvillimi, edhe artistë të tjerë që ishin pjesë e programit mbështetës njoftuan tërheqjen nga datat e mbetura. Mes tyre është Finneas, vëllai i Billie Eilish, si dhe Myles Smith, Aaron Rowe, Lukas Graham dhe grupi irlandez Beoga.
Sheeran reagoi ndaj kritikave duke deklaruar se largimi i Macklemore ishte një “vendim i promotorit” dhe jo i tij. Ai tha gjithashtu se një pjesë e madhe e audiencës së tij përbëhet nga të rinj me prejardhje të ndryshme, të cilët nuk presin që koncertet e tij të shndërrohen në një forum politik.
Ndërkohë, Macklemore, emri i vërtetë Benjamin Hammond Haggerty, pretendoi se Sheeran i kishte thënë se miliarderi Robert Kraft kishte ndërhyrë për largimin e tij nga turneu. Sipas reperit, Kraft kishte ushtruar presion përmes pronarëve të stadiumeve, duke i vendosur Sheeran-it një ultimatum.
Në rrjetet sociale, numri i ndjekësve të Sheeran ka rënë nga 47.6 milionë në 47.3 milionë, një humbje prej më shumë se 200 mijë ndjekësish.
