Tre ushtarë kolumbianë janë vrarë dhe katër të tjerë janë plagosur pas shpërthimit të pajisjeve të improvizuara eksplozive gjatë një patrullimi në një zonë rurale të departamentit Meta, në Kolumbinë qendrore.
Sipas ushtrisë, sulmi u krye nga një fraksion i ish-luftëtarëve të FARC-ut, të cilët kanë refuzuar marrëveshjen e paqes të vitit 2016 dhe kanë vijuar aktivitetin e armatosur.
Tre ushtarët humbën jetën në vend, ndërsa katër të plagosurit u transportuan në spital për trajtim mjekësor.
Sulmi vjen pak më shumë se një muaj pas nisjes së një operacioni të gjerë ushtarak kundër grupeve të armatosura që dyshohet se janë të përfshira në trafikun e drogës.
FARC, organizata guerile marksiste që luftoi për dekada kundër shtetit kolumbian, nënshkroi marrëveshjen historike të paqes me qeverinë në vitin 2016. Megjithatë, një pjesë e ish-luftëtarëve nuk e pranoi marrëveshjen dhe vijoi aktivitetin e armatosur.
Autoritetet kolumbiane i akuzojnë këto grupe për përfshirje në trafik droge, miniera të paligjshme dhe zhvatje. Pas ndryshimit të qeverisë, negociatat e paqes me disa prej grupeve të armatosura janë ndërprerë, ndërsa autoritetet kanë rikthyer urdhër-arrestet ndaj disa prej drejtuesve të tyre.
