Bordi Qendror Zgjedhor i Spanjës (JEC) ka nisur procedura disiplinore ndaj kryeministrit Pedro Sánchez, lidhur me deklaratat e tij gjatë një konference për shtyp më 6 tetor, pas mbledhjes së kabinetit qeveritar.
Gjatë konferencës, Sánchez njoftoi një ligj të ri për strehimin, ndërsa procedurat ndaj tij u konfirmuan nga zyra e shtypit e parlamentit.
Sipas raportimeve, Bordi Zgjedhor ka kërkuar që deklaratat në fjalë të hiqen nga kanalet zyrtare të qeverisë dhe e ka udhëzuar kryeministrin të shmangë sjellje të ngjashme gjatë fushatës zgjedhore.
Procedurat u iniciuan pas një ankese të Partisë Popullore (PP), e cila pretendon se Sánchez ka përdorur mjediset dhe burimet zyrtare të qeverisë për të përcjellë mesazhe me karakter elektoral.
Çështja vjen në prag të zgjedhjeve të parakohshme, të shpallura nga Sánchez për 29 nëntor, pasi propozimi i tij legjislativ për strehimin nuk arriti të siguronte mbështetjen e nevojshme parlamentare.
Përdorimi i burimeve shtetërore gjatë fushatave zgjedhore është një çështje e ndjeshme në Spanjë, pasi institucionet duhet të ruajnë neutralitetin dhe të mos favorizojnë partitë në garën politike.
Kjo nuk është hera e parë që Sánchez përballet me sanksione nga JEC. Në janar të vitit 2020, ai u gjobit me 500 euro për publikimin e një interviste televizive në faqen zyrtare të qeverisë.
Ndërsa në tetor të vitit 2023, ndaj tij u vendos një gjobë prej 2.200 eurosh për një konferencë për shtyp në Bruksel gjatë fushatës zgjedhore. Në atë rast, komisioni vlerësoi se kryeministri kishte theksuar në mënyrë të papërshtatshme arritjet e qeverisë së tij dhe kishte kritikuar kundërshtarët politikë.
