Në Paris dhe Lion, disa protestues u përplasën sot me policinë gjatë demonstratave, të cilat në përgjithësi ishin paqësore dhe u zhvilluan në mbarë vendin.
Kjo ndodhi paralelisht me një grevë njëditore të disa punonjësve të sektorit publik, një zhvillim ky që përbën një sfidë të re për presidentin Emmanuel Macron.
Këto protesta të fundit vijnë pas një sërë demonstratash lidhur me koston e jetesës, shërbimet publike dhe gjendjen në përkeqësim të sistemit arsimor, një valë pakënaqësish që është shndërruar në trazirat civile më të theksuara të parë në Francë vitet e fundit.
Ministria e Brendshme njoftoi se në protestat në mbarë vendin kanë marrë pjesë 270 mijë njerëz, pa llogaritur Parisin, ku demonstrata kryesore nisi pasdite.
Për shkak të grevës njëditore, në të cilën morën pjesë disa punonjës të sektorit të energjisë dhe mësues, Kulla Eifel u mbyll. Megjithatë, nuk pati ndërprerje të mëdha në transport. Gjithsesi, rreth dy orë pas fillimit të protestës, disa persona në krye të turmës u përplasën me policinë, e cila përdori gaz lotsjellës.
Në Lion, njësitë e policisë për kontrollin e turmave përdorën gaz lotsjellës dhe ndërhynë kundër një grupi protestuesish. Disa prej tyre, të veshur me të zeza dhe me fytyra të mbuluara, thërrisnin parulla kundër policisë.
Ministria e Brendshme bëri të ditur se, të enjten në mëngjes, disa persona hodhën mjete piroteknike, duke shkaktuar një zjarr në një shkollë të mesme jashtë Tuluzës. Kjo detyroi nxënësit dhe stafin të largoheshin nga ndërtesa, ndërsa zjarrfikësit punuan për të shuar flakët.
Greva e së enjtes në mëngjes çoi në një ulje të prodhimit të energjisë elektrike në centralet bërthamore të Francës, ndërsa Ministria e Arsimit njoftoi se në të morën pjesë pak më shumë se 15 për qind e mësuesve.
