Ballina Sport Si dështoi transferimi te Tottenhami në vitin 2019 për Bruno Fernandes

Si dështoi transferimi te Tottenhami në vitin 2019 për Bruno Fernandes

57
0

Kapiteni i Manchester Unitedit, Bruno Fernandes, ka zbuluar detaje të reja për momentin kur ishte shumë pranë transferimit te Tottenham Hotspur, në vend që të bashkohej me “Djajtë e Kuq”.

Futbollisti portugez ishte në prag të transferimit në Londrën Veriore në vitin 2019, ku do të kishte punuar me trajnerin aktual të Manchester Unitedit, Mauricio Pochettino.

Shtatë vjet pasi ishin shumë pranë bashkimit në Londrën Veriore, Fernandes dhe Pochettino më në fund pritet të punojnë së bashku në nivel klubesh.

Në vitin 2019, ylli i përfaqësueses së Portugalisë luante te Sporting Lisbona, kur Tottenhami bëri një përpjekje konkrete për ta transferuar në Angli.

Bisedimet kishin avancuar aq shumë, saqë Fernandes, atëkohë 24-vjeçar, zhvilloi takime ballë për ballë me drejtuesit e Tottenhamit dhe vizitoi ambientet e klubit.

Megjithatë, transferimi dështoi në ditët e fundit të afatit kalimtar të verës, duke bërë që portugezi të qëndronte në Portugali, deri në momentin kur Manchester Unitedi siguroi shërbimet e tij në janar të vitit 2020.

Fernandes zbulon detaje nga bisedimet me drejtuesit e Tottenhamit

Duke folur për “Sky Sports”, Fernandes kujtoi se sa seriozisht drejtuesit e Tottenhamit ia kishin prezantuar projektin e tyre gjatë negociatave.

Ai tregoi se drejtuesit e klubit i kishin shpjeguar mënyrën se si dëshironin të luanin, si dhe rolin e veçantë taktik që trajneri Mauricio Pochettino e kishte paraparë për të.

“Jam takuar me drejtuesit e Tottenhamit, me të gjithë ata. Më treguan të gjitha gjërat e mira që kishin në qendrën stërvitore, mënyrën se si dëshironin të luanin. Gjithashtu, më treguan edhe pozicionet në të cilat trajneri mendonte se mund të luaja në sistemin e tij“, deklaroi 32-vjeçari.

Pse Fernandes dëshironte të luante përkrah yjeve të Tottenhamit?

I pyetur nëse idetë taktike të Pochettinos e kishin bindur, kapiteni i Manchester Unitedit pranoi se në atë periudhë të karrierës kishte dëshirë të madhe të provonte veten në elitën e futbollit anglez.

Mundësia për të luajtur përkrah një grupi të konsoliduar futbollistësh ofensivë e bënte Tottenhamin një destinacion veçanërisht tërheqës për të.

“Po, ishte një projekt i mirë. Natyrisht, atëherë isha ende një futbollist shumë i ri, vetëm 24-vjeçar. Kisha shumë dëshirë të vija në Premierligë. Ata kishin Harry Kane, Dele Allin dhe Son Heung-min. Mundësia për të luajtur përkrah këtyre futbollistëve në repartin ofensiv ishte shumë tërheqëse“, u shpreh Fernandes.

Pasi transferimi dështoi në ditët e fundit të afatit kalimtar, Fernandes vazhdoi të shkëlqente në Portugali, përpara se vetëm disa muaj më vonë të realizonte transferimin te Manchester Unitedi.

Pochettino përballet me një debutim të vështirë kundër Liverpoolit

Fernandes dhe Pochettino më në fund do të bashkojnë forcat te Manchester Unitedi këtë fundjavë, me kapitenin portugez që pritet ta udhëheqë skuadrën në ndeshjen e së dielës.

Manchester Unitedi renditet në pozitën e 18-të në tabelë, ndaj trajneri i ri përballet menjëherë me presion të madh dhe pritshmëri të larta.

Debutimi kundër rivalit të përbetuar, Liverpoolit, e bën sfidën edhe më të vështirë, ndërsa Pochettino synon ta rikthejë sa më shpejt skuadrën në rrugën e duhur.