BE-ja mirëpret marrëveshjen e partneritetit ekonomik SHBA-Ukrainë të nënshkruar rishtazi dhe theksoi se marrëveshja nuk do të pengojë procesin e pranimit të Ukrainës, tha zëdhënësja kryesore e Komisionit Evropian, Paula Pinho.
“Ne e mirëpresim marrëveshjen që u arrit, e cila merr në konsideratë, veçanërisht procesin e pranimit të Ukrainës”, tha Pinho, duke folur në konferencën e përditshme për shtyp në Bruksel.
Ajo tha se marrëveshja nuk do të ketë një ndikim negativ në anëtarësimin e ardhshëm të Ukrainës në BE, duke lehtësuar shqetësimet në Kiev në lidhje me konfliktet e mundshme të interesit.
SHBA-ja dhe Ukraina njoftuan më parë se ishte nënshkruar një marrëveshje kritike për mineralet, pas muajsh negociatash shpesh të tensionuara.
Sipas marrëveshjes, do të krijohet Fondi i Investimeve për Rindërtim midis Shteteve të Bashkuara dhe Ukrainës.
Departamenti i Thesarit i SHBA-së tha se partneriteti ekonomik do t’u lejonte të dy vendeve të punonin në bashkëpunim për të përshpejtuar rimëkëmbjen ekonomike të Ukrainës, duke theksuar “mbështetjen e rëndësishme financiare dhe materiale” të Uashingtonit për Kievin që nga fillimi i luftës me Rusinë në vitin 2022.
Ministrja e Ekonomisë e Ukrainës, Yulia Svyrydenko, tha se fondi do të përdoret për të investuar në projekte për nxjerrjen e lëndëve djegëse fosile të dobishme dhe naftës e gazit, si dhe në infrastrukturë ose projekte riciklimi që do të vendosen bashkërisht nga të dy vendet.
