Sezoni i tretë i serialit të famshëm “Squid Game” ka qenë një nga prodhimet më të ndjekura dhe më të komentuara të vitit 2025.
Kjo seri e re përbën një përmbyllje dramatike dhe të errët të lojërave të tmerrshme që filluan në sezonin e dytë, të udhëhequra nga personazhi kryesor, Gi-hun.
Ndërsa pamjet e ndryshme, sfidat makabre dhe tensioni i vazhdueshëm e mbajnë audiencën të mbërthyer përmes çdo episodi, një detaj në dukje i vogël ka bërë shumë bujë në rrjetet sociale: foshnja misterioze dhe e frikshme që shfaqet gjatë episodeve.
Shumë shikues kanë pohuar se ka diçka të pazakontë dhe të ftohtë në mënyrën si duket dhe sillet, duke e cilësuar madje si “shqetësuese” ose “e pakëndshme”.
E vërteta është se kjo foshnjë nuk është reale dhe as nuk është krijuar vetëm me efekte kompjuterike. Për të arritur një pamje sa më të besueshme dhe realiste, ekipi i prodhimit përdori një robot hiper-realist, me përmasa, peshë dhe mimika identike me ato të një foshnjeje të vërtetë.
Në disa skena specifike, ky robot është përmirësuar me efekte CGI (grafikë të gjeneruar nga kompjuteri), për të shtuar lëvizje më të buta ose shprehje më komplekse emocionale.
Arsyet për të shmangur përdorimin e një foshnjeje të vërtetë janë të shumta dhe të kuptueshme. Para së gjithash, bëhet fjalë për sigurinë dhe mirëqenien e një foshnjeje, veçanërisht në skena të ngarkuara emocionalisht apo me përmbajtje të frikshme dhe komplekse për t’u xhiruar.
Gjithashtu, ligjet koreane për punën e fëmijëve janë shumë strikte, duke e bërë të vështirë angazhimin e një të mituri për orare të zgjatura ose skena të vështira.
Kalendari intensiv i xhirimeve për këtë sezon do ta kishte bërë edhe më të pamundur përfshirjen e një foshnjeje të vërtetë.
Producentët vendosën gjithashtu të mos përziejnë pamje të një foshnjeje reale me atë të krijuar digjitalisht, për të shmangur ndryshimet e dukshme në ekran dhe për të ruajtur një koherencë vizuale gjatë gjithë serialit.
E njëjta metodë është përdorur edhe për një qen që shfaqet në sezon, i cili është gjithashtu një kombinim mes robotike dhe CGI.
Edhe pse kjo zgjidhje teknologjike u bë për arsye etike dhe logjistike, ka pasur reagime të përziera nga publiku. Disa e kanë quajtur zgjuarsi teknike, ndërsa të tjerë mendojnë se efekti ka qenë më shumë shqetësues se sa bindës.
Në fund, “foshnja” e Squid Game mbetet një nga elementët më të diskutuar të sezonit të tretë dhe një shembull i qartë se si teknologjia po zëvendëson gjithnjë e më shumë aktorët realë në role të ndjeshme ose të rrezikshme.
