Prindërit në Kinë do të përfitojnë nga një subvencion vjetor prej 3,600 juanë (rreth 500 dollarë) për secilin fëmijë nën moshën tre vjeç, në përpjekjen e parë kombëtare të qeverisë për të ndaluar rënien e vazhdueshme të lindjeve në vend.
Sipas mediave shtetërore, kjo skemë pritet të ndihmojë rreth 20 milionë familje, duke zbutur kostot e rritjes së fëmijëve, që janë ndër më të lartat në botë në terma relativë.
Nisma vjen në një kohë kur shkalla e lindjeve në Kinë është në rënie, pavarësisht heqjes së politikës së një fëmije gati një dekadë më parë. Zyrtarët po përpiqen të frenojnë pasojat e një krize demografike në zhvillim, që po karakterizohet nga plakja e popullsisë dhe rënia e fuqisë punëtore.
Popullsia vazhdon të tkurret, pavarësisht rritjes së lindjeve në 2024
Në janar, Byroja Kombëtare e Statistikave njoftoi se Kina regjistroi 9.54 milionë lindje në vitin 2024, një rritje e lehtë nga viti i mëparshëm. Megjithatë, popullsia e përgjithshme e vendit ra për të tretin vit radhazi, duke arritur në rreth 1.4 miliardë banorë.
Plakja e popullsisë është një tjetër shqetësim i madh për Pekinin, pasi përbën sfidë serioze për rritjen ekonomike dhe qëndrueshmërinë e sistemit të pensioneve.
