Demonstruesit në Katmandu, Nepal sfiduan shtetrrethimin, hynë me forcë dhe i vunë flakën ndërtesës së parlamentit. Më parë ata kishin sulmuar zyrën e Kongresit Nepalez, partisë më të madhe të vendit, dhe disa rezidenca të politikanëve të shquar.
Kryeministri i Nepalit, KP Sharma Oli, dha dorëheqjen të martën mes protestave kundër korrupsionit që po përshkallëzoheshin. Dorëheqja erdhi një ditë pasi 19 persona u vranë nga forcat e sigurisë në demonstratat e dhunshme të shkaktuara nga një ndalim i mediave sociale.
Të rinjtë mbushën kompleksin e parlamentit me të dëgjuar lajmin, duke tundur duart dhe duke bërtitur slogane ndërsa tymi dilte nga disa pjesë të ndërtesës.
Qeveria e Olit kishte hequr ndalimin e mediave sociale pasi protestat u intensifikuan të hënën kur policia përdori municione luftarake, gaz lotsjellës dhe plumba gome kundër demonstruesve që përpiqeshin të sulmonin parlamentin. Përballja vrau 19 persona dhe plagosi më shumë se 100 të tjerë.
“Ne fituam”, shkroi një protestues me shkronja të mëdha portokalli në një mur ngjyrë bezhë të ndërtesës së parlamentit, ndërsa një tjetër aty pranë shfaqi me gishtat një shenjë “V” për fitoren.
Edhe pse protestuesit mbetën në rrugë pas dorëheqjes së Olit, dëshmitarët nuk raportuan për përplasje apo dhunë, pasi forcat e sigurisë as nuk ndërhynë dhe as nuk u përpoqën të përdorin forcë.
Këto trazira shënojnë më të këqijat në vite për kombin himalajan të vendosur midis Indisë dhe Kinës. Dhuna ishte më e keqe se një kryengritje e vitit 2006 që e detyroi mbretin e fundit të Nepalit të dorëzonte pushtetin ekzekutiv dhe vrau 18 persona. Dy vjet më vonë, parlamenti shfuqizoi monarkinë.
