Nëse jeni aventurier në kërkim të vendeve që duken sikur nuk i përkasin këtij planeti, ekziston një qytet që me siguri do t’ju intrigojë. Bëhet fjalë për Longyearbyen, një nga qytetet më veriore në botë, i vendosur në arkipelagun norvegjez të Svalbardit, thellë në Oqeanin Arktik.
Me rreth dy mijë banorë dhe afërsi të vazhdueshme me arinjtë polarë, Longyearbyen duket si skenë nga filmat fantastiko-shkencorë. Megjithatë, sot ai është shndërruar në një nga destinacionet turistike më të veçanta dhe më të kërkuara të Norvegjisë.
Një qytet ku macet nuk lejohen
Një nga rregullat më të pazakonta është ndalimi i mbajtjes së maceve. Arsyeja lidhet me mbrojtjen e ekosistemit delikat arktik, veçanërisht popullatës së zogjve, të cilët nuk kanë grabitqarë natyrorë në këtë zonë. Çdo përpjekje për të sjellë një mace në qytet është kthyer më shumë në legjendë lokale sesa në histori suksesi.
Qyteti ku “nuk duhet të vdesësh”
Një tjetër fakt befasues: që nga viti 1950, varrimet janë të ndaluara në Longyearbyen. Për shkak të ngricës së përhershme, trupat nuk dekompozohen, por ruhen pothuajse të paprekur. Gjatë studimeve shkencore, në disa trupa të vjetër u zbulua edhe virusi i gripit spanjoll të vitit 1918, duke ngritur shqetësime serioze shëndetësore.
Për këtë arsye, banorët që sëmuren rëndë transportohen në jug të Norvegjisë, ndërsa në qytet lejohen vetëm urnat funerale.
Gjashtë muaj errësirë, gjashtë muaj dritë
Pozicioni gjeografik i Longyearbyen krijon një ritëm unik të jetës. Nga nëntori deri në shkurt, dielli nuk lind fare, por qielli ndriçohet nga aurora borealis. Rikthimi i diellit në mars festohet me festivalin tradicional Solfestuk.
Nga maji deri në shtator, qyteti përjeton diellin e mesnatës, një fenomen që shpesh çrregullon orët e gjumit të vizitorëve, por i magjeps ata me dritën e pandërprerë.
Të hënën në Londër, një takim midis Zelensky, Starmer, Mertz dhe Macron për Ukrainën
Jetë mbi borë
Makina nuk janë mjeti kryesor i transportit këtu. Në vend të tyre, motorët e borës janë simbol i qytetit – ka më shumë të tillë sesa banorë. Turistët i përdorin për të eksploruar akullnajat, ajsbergët dhe natyrën e egër arktike. Një tjetër përvojë autentike është rrëshqitja me sajë tërhequr nga qentë, një traditë e dashur dimërore.
Ekstreme të temperaturës
Vera në Svalbard është e freskët, me temperatura mesatare nga 3 deri në 7 gradë Celsius, ndërsa dimrat shkojnë nga -13 deri në -20 gradë. Temperaturat ekstreme variojnë nga 21.3 gradë Celsius si maksimum historik, deri në -46.3 gradë si minimum absolut.
Longyearbyen arrihet me fluturim rreth tre orësh nga Oslo – një udhëtim i shkurtër drejt një bote krejtësisht ndryshe, ku rregullat e natyrës dhe të jetës sfidojnë çdo imagjinatë.
