Banorët e zonës “Sektor Rinia” në Durrës janë ngritur në protestë, duke kërkuar ndërhyrje urgjente të shtetit për rikonstruksionin e aksit rrugor që lidh fshatin “Adriatik” me qytetin dhe shërben edhe për plazhet e zonës.
Rruga, e quajtur me të drejtë “Rruga e mundimeve”, ka marrë 1.4 miliardë lekë investime gjatë 10 viteve të fundit, por vazhdon të jetë e amortizuar, pa ndriçim dhe burim aksidentesh.
Vetëm gjatë muajve të fundit, në këtë aks janë shënuar dhjetëra aksidente me 6 viktima.
Banorët denoncojnë se rruga gjatë dimrit mbushet me baltë dhe ujë, ndërsa gjatë verës pushtohet nga pluhuri, duke e bërë të vështirë qarkullimin dhe duke rritur rrezikun për të gjithë.
“3 vjet kështu, e as kujtohet njeri. Rruga është katastrofë, para tre ditësh vdiq një 70-vjeçare.”-shprehen banorët.
Protestuesit kërkojnë ndërhyrje të menjëhershme dhe investime reale për ta kthyer rrugën në një aks të sigurt dhe funksional për komunitetin dhe turistët që frekuentojnë zonën.
