Sekreti i vorbullave gjigante në polet e Jupiterit dhe Saturnit qëndron në strukturën e tyre, domethënë në përbërjen kimike të shtresave më të thella.
Kjo tregohet nga një studim i botuar në revistën e Akademisë së Shkencave të Shteteve të Bashkuara, Proceedings of the National Academy of Sciences, të udhëhequr nga Jiaru Shi i Institutit të Teknologjisë në Masaçusets.
Sondat hapësinore të dërguara për të studiuar nga afër dy planetët gjigantë të Sistemit Diellor, kanë hedhur dritë mbi shumë nga detajet e tyre dhe kanë zbuluar gjithashtu disa nga karakteristikat e tyre unike, të tilla si vorbullat gjigante në polet e tyre të shkaktuara nga stuhitë kolosale me forma të çuditshme. Saturni, në fakt, përmban një vorbull të vetme gjigante me një formë të çuditshme gjashtëkëndore, ndërsa vorbulla e Jupiterit është e rrethuar nga tetë vorbulla më të vogla me diametër të ngjashëm me atë të Tokës.
Meqenëse të dy planetët janë të ngjashëm në shumë mënyra, të tilla si madhësia dhe përbërja, ndryshimi i madh në vorbullat e tyre polare është mjaft i vështirë për t’u kuptuar.
Simulimet e reja të sapo publikuara do të tregonin se ndryshimet në formë dhe strukturë, mund të jenë për shkak të karakteristikave të pranishme në shtresat më të thella të dy planetëve. Në Jupiter, për shembull, poshtë vorbullës meteorologjike ekziston një shtresë materialesh të lehta, që në një pikë të caktuar bllokon rritjen e saj dhe gjeneron një sërë vorbullash më të vogla.
Megjithatë, në Saturn ekziston një shtresë më e dendur në bazën e një vorbulle, duke lejuar që vorbulla të rritet ndjeshëm, duke formuar përfundimisht struktura gjigante. “Ajo që vëzhgojmë nga sipërfaqja, vorbullat në Jupiter dhe Saturn, mund të na tregojnë diçka rreth brendësisë së tyre”, tha Shi. “Ndoshta”, shtoi ai, “nën sipërfaqe, Saturni është më i pasur me metale dhe përmban materiale më të dendura dhe të shtresuara sesa Jupiteri. Kjo do të zgjeronte kuptimin tonë për gjigantët e gazit”.
