Dokumente hetimore të publikuara së fundmi nga Departamenti Amerikan i Drejtësisë sjellin detaje të reja mbi marrëdhënien e ngushtë mes akademikut të njohur Noam Chomsky dhe financierit të dënuar për krime seksuale, Jeffrey Epstein.
Dosjet, pjesë e të ashtuquajturave “Epstein files”, përmbajnë email-e dhe shkëmbime të shumta që tregojnë një miqësi të afërt personale dhe shoqërore mes dy burrave, e cila shkon përtej asaj që Chomsky kishte deklaruar më herët si një marrëdhënie kryesisht financiare. Në një prej mesazheve, Chomsky shprehet se po “fantazon për ishullin karaib”, duke iu referuar një ftese për pushime nga Epstein — megjithëse dokumentet nuk specifikojnë në mënyrë të drejtpërdrejtë se bëhet fjalë për ishullin privat të Epstein-it, ku më vonë u zbuluan abuzime seksuale ndaj të miturve.
Email-et tregojnë gjithashtu planifikime për takime shoqërore, darka dhe udhëtime, si dhe përfshirjen e figurave të tjera të njohura publike në rrethin e tyre. Në një rast, Chomsky kërkoi një takim prezantues me Steve Bannon-in, ish-strategun kryesor të Donald Trump-it, duke theksuar se kontaktin e kishte marrë përmes Epstein-it.
Dokumentet zbulojnë edhe këshilla që Chomsky dyshohet se i ka dhënë Epstein-it në vitin 2019 për mënyrën se si të përballej me kritikat publike dhe mediatike, disa muaj përpara arrestimit të tij për trafikim seksual. Sipas një email-i të nënshkruar “Noam”, këshilla ishte që Epstein të mos reagonte ndaj akuzave dhe t’i injoronte ato, duke i cilësuar reagimet publike si pjesë e një “histerie” të kohës.
As Chomsky dhe as bashkëshortja e tij, Valeria Chomsky, nuk kanë reaguar publikisht për autenticitetin e këtyre mesazheve.
Përveç çështjeve shoqërore, marrëdhënia mes Chomsky-t dhe Epstein-it përfshinte edhe bashkëpunim financiar. Epstein i dha këshilla Chomsky-t në konflikte ligjore familjare lidhur me pasurinë dhe menaxhimin e parave, ndërsa bashkëshortja e Chomsky-t organizoi edhe pagesa që lidhen me aktivitete akademike në gjuhësi.
Email-e të tjera zbulojnë një ton personal dhe herë-herë lozonjar mes dy burrave, përfshirë shaka dhe biseda private që tregojnë një familjaritet të thellë.
Publikimi i këtyre dokumenteve vjen në kuadër të një ligji të transparencës së Kongresit amerikan dhe ka rihapur debatin mbi mënyrën se si autoritetet federale e trajtuan çështjen Epstein. Interesi publik u rrit veçanërisht pas premtimeve të Donald Trump-it për publikimin e plotë të dosjeve, edhe pse më pas Departamenti i Drejtësisë deklaroi se nuk ekziston një listë e klientëve të Epstein-it.
Noam Chomsky, 97 vjeç, është profesor emeritus në MIT dhe ndodhet prej vitit 2023 në leje mjekësore nga Universiteti i Arizonës.
