Eriola Bibolli, anëtare e Bordit të Menaxhimit të ProCredit Holding AG, ka marrë detyrën e Kryetares së Bordit të Menaxhimit nga Hubert Spechtenhauser, duke nisur nga 1 marsi 2026. Z. Spechtenhauser, sipas planifikimit, ka dalë në pension në fund të shkurtit 2026. Ai e ka mbajtur pozicionin e Kryetarit të Bordit të Menaxhimit të ProCredit Holding që nga 1 nëntori 2022.
“Gjatë pesë viteve të fundit, Hubert Spechtenhauser ka luajtur një rol kyç në formësimin e zhvillimit strategjik dhe operacional të grupit ProCredit, përfshirë ndryshimin e formës ligjore në vitin 2023 dhe riorientimin strategjik të grupit të komunikuar në Capital Markets Day 2024. Me ekspertizën e tij të thellë të fituar nga më shumë se tridhjetë vite përvojë në institucione financiare drejtuese, vizionin e tij të qartë dhe përkushtimin e palëkundur, ai ka forcuar grupin tonë bankar në afatgjatë dhe e ka pozicionuar për të ardhmen,” tha Kryetari i Bordit Mbikëqyrës, Rainer Ottenstein. “Në emër të gjithë Bordit Mbikëqyrës, dëshiroj të shpreh vlerësimin tonë të sinqertë për ekspertizën e tij të gjerë, lidershipin shembullor dhe përkushtimin e tij të vazhdueshëm.
Për ProCredit, fakti që tani mund të plotësojë këtë pozicion kërkues të Kryetarit të Bordit të Menaxhimit nga radhët e veta është një shenjë e fortë e kulturës së saj korporative dhe forcës së brendshme,” shpjegoi z. Ottenstein. “Me emërimin e znj. Bibolli, kemi gjetur kandidaten ideale. Znj. Bibolli mishëron stabilitetin, ndërsa njëkohësisht nxit një qasje të avancuar ndaj dixhitalizimit, shkallëzimit dhe rritjes dinamike në përgjithësi.”
Ai vijoi: “Ajo është pjesë e ProCredit që nga viti 2001 dhe sjell një perspektivë operacionale të fituar nga puna në nivel banke në menaxhimin e grupit. Kur u bë anëtare e Bordit të Menaxhimit të ProCredit Holding AG në vitin 2023 dhe mori fillimisht përgjegjësinë si Drejtore e Riskut (Chief Risk Officer), ajo riformësoi strategjinë e riskut dhe forcoi strukturat e riskut. Më vonë gjatë atij viti, kur mori përgjegjësi për një portofol të gjerë strategjik – ndër të tjera Banking për Individë dhe MSME, IT të Grupit dhe PCH IT – ajo zhvilloi, ndër të tjera, një strategji transformuese për bankingun dixhital për individë. Ajo krijoi struktura për zhvillimin e biznesit në ProCredit Holding dhe ridizajnoi qeverisjen dhe modelin operacional drejt operacioneve dixhitale dhe agile.”
E lindur në Shqipëri, znj. Bibolli ka studiuar administrim biznesi dhe e nisi karrierën e saj profesionale me grupin ProCredit në vitin 2001 në ProCredit Bank Kosovë. Nga viti 2007 deri në vitin 2019, ajo mbajti pozicionin e Zëvendës Drejtores së Përgjithshme dhe anëtares së Bordit të Menaxhimit, përpara se të emërohej Drejtore e Përgjithshme në vitin 2019. Ajo kontribuoi ndjeshëm në zhvillimin e suksesshëm të bankës. Në vitin 2023, znj. Bibolli u bë anëtare e Bordit të Menaxhimit të ProCredit Holding AG. Ajo ka qenë aktive për shumë vite në tregjet ku operon ProCredit në Evropën Juglindore dhe Lindore dhe ka fituar ekspertizë të gjerë në operacionet që u shërbejnë si bizneseve, ashtu edhe klientëve individë.
“Grupi ProCredit ka qenë shtëpia ime profesionale për më shumë se dy dekada dhe mezi pres përgjegjësitë e mia të reja,” tha znj. Bibolli në fillim të mandatit të saj. “Ajo që e bën ProCredit të veçantë për mua janë njerëzit dhe bindja se ne në ProCredit mund të bëjmë diferencën, si për sipërmarrësit ashtu edhe për klientët privatë. Në një botë të përcaktuar nga ndryshime të shpejta dhe përshpejtim dixhital, suksesi ynë do të varet nga sa të guximshëm dhe fleksibël mund të jemi për t’u zhvilluar, duke përdorur teknologjinë për të përmbushur pritshmëritë gjithnjë në rritje të klientëve tanë, ndërsa mbetemi të qëndrueshëm në vlerat që na udhëheqin. Duke përqafuar këtë zhvillim me qartësi, qëllim dhe shpejtësi, ne do të mundësojmë transformim pozitiv dhe do ta pozicionojmë grupin ProCredit si një grup bankar të fokusuar në qëndrueshmëri dhe të mbështetur në teknologji dixhitale në Evropën Juglindore dhe Lindore deri në vitin 2029. Me këtë kuptim, pres me padurim rolin tim të ri.”
Hubert Spechtenhauser do të mbetet pjesë e grupit ProCredit si anëtar i bordeve mbikëqyrëse në bankat ProCredit.
