Komisionerja për Zgjerimin e Bashkimi Evropian, Marta Kos, ka dërguar një mesazh të fortë për vendet që synojnë anëtarësimin në BE, mes tyre edhe Shqipëria.
Në një reagim të publikuar në platformën X (Twitter), ajo thekson se vendet që kërkojnë të bëhen pjesë e unionit duhet të ndërtojnë demokraci të forta dhe institucione të qëndrueshme.
Kos nënvizon se procesi i integrimit kërkon reforma reale dhe të qëndrueshme, duke paralajmëruar se nuk mund të ketë rrugë të shkurtra drejt anëtarësimit.
‘Asnjë kalë Troje. Vendet që do të na minonin nga brenda nuk mund të bëhen shtete anëtare. Duhet të sigurohemi plotësisht për këtë.
Vendet që i bashkohen BE-së duhet të jenë demokraci të forta dhe të qëndrueshme, të afta t’i rezistojnë ndikimit toksik të Rusisë dhe të aktorëve të tjerë. Natyrisht, nuk mund të ketë rrugë të shkurtra në reforma. Qytetarët tanë europianë e presin këtë nga ne’, shkruan ajo në mesazhin e saj.
Ky mesazh vjen në një moment kur vendimi i Kuvendi i Shqipërisë lidhur me çështjen e Belinda Balluku ka ndezur debat të fortë politik për pavarësinë e drejtësisë dhe respektimin e ligjit në vend.
Në këtë kontekst, deklarata e Kos shihet nga disa si një sinjal për institucionet shqiptare dhe qeverinë e kryeministrit Edi Rama, për të garantuar funksionimin e drejtësisë pa ndërhyrje politike dhe për të thelluar reformat e kërkuara në rrugën drejt integrimit europian.
