Sistemi energjetik në Shqipëri ka regjistruar një rritje të kërkesës dhe një përmirësim të ndjeshëm të prodhimit gjatë muajit shkurt 2026, duke reflektuar një situatë më të favorshme hidrike krahasuar me një vit më parë.
Sipas të dhënave të Operatorit të Sistemit të Transmetimit (OST), ngarkesa totale në sistem arriti në 700 GWh në shkurt 2026, nga 676.1 GWh në shkurt 2025, duke shënuar një rritje prej rreth 3.5% në terma vjetorë. Ndërkohë, krahasuar me shkurtin 2024, ku kërkesa ishte 636 GWh, rritja rezulton edhe më e fortë, duke konfirmuar një trend në rritje të konsumit të energjisë në vend.
Por zhvillimi më domethënës lidhet me prodhimin vendas të energjisë, i cili ka pësuar një rritje shumë të fortë. Në shkurt 2026, prodhimi total arriti në 1,218,663 MWh, nga vetëm 684,878 MWh në shkurt 2025, duke u rritur me rreth 78% në bazë vjetore.
Ky zgjerim i prodhimit është mbështetur kryesisht nga hidrocentralet, që vijojnë të dominojnë strukturën e prodhimit në vend. Prodhimi nga HEC-et me rezervuar arriti në 822,141 MWh, ndërsa ato me derivacion kontribuan me 365,854 MWh. Në të njëjtën kohë, prodhimi nga burimet fotovoltaike u rrit në 30,668 MWh, nga 24,797 MWh një vit më parë, duke treguar një zgjerim gradual të energjisë diellore në miksin energjetik.
Nga ana tjetër, prodhimi nga termocentralet rezulton praktikisht i papërfillshëm në shkurt 2026, ndërkohë që një vit më parë kishte një kontribut prej rreth 22,839 MWh. Kjo tregon një varësi edhe më të madhe nga burimet hidrike, por edhe një ulje të përdorimit të burimeve më të kushtueshme si TEC-et.
Në terma strukturorë, mbi dy të tretat e prodhimit në shkurt 2026 u siguruan nga HEC-et me rezervuar, duke konfirmuar rolin dominues të tyre në stabilitetin e sistemit energjetik. Rritja e prodhimit ka ndihmuar në mbulimin më të mirë të kërkesës së brendshme dhe potencialisht në uljen e nevojës për importe, një faktor kyç për balancat financiare të sektorit. /ekofin.al
