Babai i 19-vjeçares Myrto ka dhënë një version tjetër mbi rrethanat e vdekjes së vajzës së tij, duke deklaruar për “MEGA” se ajo mund të ketë rënë viktimë e një rrjeti shfrytëzimi, madje duke përmendur edhe mundësinë që të ishte planifikuar rrëmbimi i saj për ta çuar në Athinë.
“Po luaj rolin e MacGyver-it. Nuk e di, thjesht po spekuloj. I morën celularin vajzës sime, kushdo mund t’i dërgonte mesazhe”, u shpreh ai fillimisht.
Ai foli gjithashtu për ekzistencën e mundshme të një rrethi personash pas ngjarjes tragjike që tronditi opinionin publik grek të hënën e Pashkëve, duke pretenduar se Myrto mund të ishte vënë në shënjestër për shfrytëzim seksual me qëllim përfitimi financiar.
“Ka edhe të tjerë të përfshirë, duhet të shohim si arritëm në atë dhomë”, theksoi ai.
Në të njëjtën linjë, avokati i familjes, z. Drakoulogonas, konfirmoi se në ishull qarkullojnë informacione për përfshirjen e personave të tjerë në vdekjen e 19-vjeçares.
“Vetëm kështu do të dalë në dritë e vërteta për atë që ndodhi. Humbja e Myrtos mund të shërbejë si një moment për të pastruar komunitetin nga fenomene të tilla”, deklaroi ai për ERT.
Avokati shtoi se nga të dhënat e deritanishme duket se në zonë veprojnë persona që mbajnë kontakte telefonike dhe online me individë të caktuar, duke nënvizuar nevojën për hetime më të thelluara.
“Katër orët e fundit dhe katër ditët para ngjarjes duhet të analizohen për të kuptuar si dhe në çfarë rrethanash përfunduam në atë dhomë”, theksoi ai.
Ndërkohë, ish-oficeri i policisë George Kalliakmanis deklaroi se kishte indikacione për një plan të mundshëm për përfshirjen e vajzës në prostitucion, plan që sipas tij nuk u realizua për shkak të përfundimit tragjik të saj.
Ai përmendi gjithashtu se në një dhomë tjetër ndodhej një vajzë 18-vjeçare, duke lënë të kuptohet se rasti mund të mos jetë i izoluar, por pjesë e një aktiviteti më të gjerë.
Çfarë deklaroi avokati për mjekët?
Sa i përket ndërhyrjes mjekësore, avokati i familjes bëri të ditur se sipas nënës së viktimës, personeli shëndetësor ishte i pranishëm që në momentet e para të incidentit. “Nëna më konfirmoi se të gjithë mjekët dhe punonjësit ishin në vend që në fillim”, u shpreh ai.
