Ish-deputeti demokrat Ervin Salianji ka shpërthyer me akuza të forta ndaj lidershipit të opozitës, duke ngritur dyshime për një “pakt të heshtur” mes Edi Ramës dhe Sali Berishës.
Përmes një reagimi në Facebook, Salianji thotë se opozita ka hequr dorë nga roli i saj përballë qeverisë dhe është kthyer në “oksigjen politik” për Ramën në momentet më të vështira.
Sipas tij, shqiptarët po mbahen peng nga një marrëveshje mbijetese politike, ku “Rama mban pushtetin dhe Berisha mban partinë”, ndërsa qytetarëve po u mohohet e drejta për të zgjedhur alternativa reale.
“Kur opozita bashkon votat me qeverinë pikërisht në ditët më të vështira të saj, nuk kemi më përballje politike, por mbijetesë të ndërsjellë”, shkruan Salianji, duke ironizuar qëndrimet e Partisë Demokratike në raport me mazhorancën.
Ai shkon edhe më tej, duke e cilësuar bashkimin e votave me socialistët si “mëkat ndaj shoqërisë dhe tradhti ndaj demokratëve që kanë sakrifikuar për të rrëzuar këtë regjim”.
Deklarata e ish-deputetit vjen në një moment tensionesh të forta politike dhe debatesh mbi raportin e opozitës me qeverinë, ndërsa akuzat për pazare politike brenda kampit opozitar duket se po thellojnë përçarjet në të djathtën shqiptare.
“Në vend që opozita të ishte alternativa morale dhe politike përballë pushtetit, po shohim një marrëveshje të heshtur mbijetese: Rama mban pushtetin, Berisha mban partinë. Dhe në fund humbësi i vetëm mbeten qytetarët shqiptarë, të cilëve po u merret e drejta për të zgjedhur mes alternativash të vërteta.
Berisha voton për Ramën, Rama garanton pa garë Berishën nesër dhe qytetarëve u hiqet çdo mundësi reale zgjedhjeje.
Kur opozita bashkon votat me qeverinë pikërisht në ditët më të vështira të saj, nuk kemi më përballje politike, por mbijetesë të ndërsjellë.
Të bashkosh votat me Ramën dy javë rresht, në momentin kur qeveria është nën presion për korrupsionin, zgjedhjet, standardet demokratike dhe integrimin europian, është mëkat ndaj shoqërisë dhe tradhti ndaj demokratëve që kanë sakrifikuar për të rrëzuar këtë regjim.
Kur narrativa është se Shqipëria jeton në regjim dhe se integrimi europian duhet të bazohet mbi meritë, atëherë pyetja është e thjeshtë:çfarë merite ka Edi Rama që sa herë ndodhet në zgrip, merr oksigjen politik nga Sali Berisha?”, shkruan Salianji.
