Një tjetër polemikë ka shpërthyer në Kupën e Botës 2026, pasi një zyrtar i sistemit VAR rrezikon të largohet nga turneu për shkak të një gjesti të bërë gjatë transmetimit televiziv të ndeshjes mes Gjermanisë dhe Kurasao-s.
Bëhet fjalë për australianin Shaun Evans, i cili u pa në ekran duke bërë me dorën e djathtë simbolin e njohur si “OK” në momentin kur nisi transmetimi zyrtar i ndeshjes. Pamjet u shpërndanë me shpejtësi në rrjetet sociale, duke nxitur debate të shumta mbi domethënien e gjestit.
Disa e interpretuan atë si pjesë të një loje të njohur në Shtetet e Bashkuara, ndërsa të tjerë e lidhën me simbolikën që në disa raste është përdorur nga grupe të ekstremit të djathtë. Rrjeti Fare, organizatë që bashkëpunon prej vitesh me FIFA-n dhe UEFA-n në monitorimin e rasteve të racizmit dhe diskriminimit në futboll, reagoi me një deklaratë të ashpër.
Sipas organizatës, ekspertët e saj vlerësojnë se gjesti i bërë nga Evans ngjan me simbolin e përdorur në disa qarqe të ekstremit të djathtë si shenjë e “white power”. Për këtë arsye, Fare ka kërkuar që zyrtari australian të mos ketë më asnjë rol në vazhdim të turneut.
Megjithatë, deri më tani nuk ka prova që tregojnë se gjesti kishte qëllim politik apo ideologjik. Mbetet e paqartë nëse Evans po përdorte një simbol me konotacion të caktuar apo nëse bëhej fjalë thjesht për një shaka të zakonshme.
FIFA ende nuk ka marrë një vendim zyrtar për rastin, por incidenti ka tërhequr vëmendje të madhe ndërkombëtare dhe mund të çojë në masa disiplinore ndaj zyrtarit.
Evans është një nga 30 specialistët e VAR-it të përzgjedhur nga FIFA për të punuar në Kupën e Botës 2026, turne që po zhvillohet në Shtetet e Bashkuara, Kanada dhe Meksikë dhe që tashmë është shoqëruar nga disa polemika që në ditët e para të garës.
