Elisa Spiropali, ka reaguar pas deklaratave të kryeministrit Edi Rama, i cili gjatë mbledhjes së grupit parlamentar ironizoi idenë e një “Shqipërie të Re” dhe “Marrëveshjes së Re për Shqipërinë”, të artikuluar prej saj ditët e fundit.
Përmes një reagimi publik, Spiropali theksoi se vizioni për një Marrëveshje të Re nuk është një slogan politik apo një iluzion, por një domosdoshmëri për të ndërtuar një Shqipëri më të drejtë, më meritokratike dhe më europiane.
“Shqipëria që duam të ndërtojmë duhet të jetë më e hapur, më demokratike dhe më pranë qytetarëve. Marrëveshja e Re nuk ka të bëjë me etiketa apo me debate personale, por me nevojën për të reflektuar, për t’u përmirësuar dhe për t’i dhënë vendit energji të reja”, është shprehur Spiropali.
Reagimi i saj vjen pasi Rama foli për “disa shpirtra të humbur” brenda Partisë Socialiste që kërkojnë një “Shqipëri të Re”, duke shtuar me ironi se pret ende draftin e saj, por ka frikë se ai nuk do të vijë kurrë.
Debati mes dy figurave socialiste ka marrë vëmendje të veçantë edhe për faktin se deklaratat e Spiropalit erdhën në një moment tensionesh publike lidhur me protestat kundër projektit të Zvërnecit. Në qëndrimin e saj, ajo kishte bërë thirrje për më shumë reflektim politik dhe institucional, duke argumentuar se vendi ka nevojë për një kontratë të re besimi mes politikës dhe qytetarëve.
Burime pranë Spiropalit bëjnë me dije se qëndrimi i saj mbetet i pandryshuar: reforma, vetëpastrimi dhe hapja e mëtejshme e Partisë Socialiste janë kushtet për të garantuar një Shqipëri më moderne dhe më europiane.
Sipas saj, “Marrëveshja e Re për Shqipërinë” nuk është kundër askujt, por në funksion të përmirësimit të vendit dhe forcimit të demokracisë.
