Kompania kineze e robotikës Unitree ka prezantuar robotin humanoid, për të cilin thotë se mund të vrapojë më shpejt se njeriu më i shpejtë i regjistruar ndonjëherë, Usain Bolt dhe të kërcejë deri në 2 metra nga vendi.
Unitree Robotics njoftoi të hënën se roboti, i quajtur ‘Superman’, arriti një shpejtësi maksimale prej 12.66 metrash në sekondë, ose rreth 45.6 kilometra në orë, ndërsa këmbët e tij kanë një gjatësi prej 0.85 metrash.
Sipas kompanisë, roboti u zhvillua në pak më shumë se tre muaj dhe performanca e tij mund të përmirësohet edhe më tej.
Demonstrimi vjen në një kohë kur kompanitë kineze po garojnë për të zhvilluar robotë humanoidë të aftë të kryejnë lëvizje gjithnjë e më të shpejta dhe komplekse.
Në një njoftim të veçantë të publikuar këtë muaj, Unitree bëri të ditur se ka prodhuar rreth 18 mijë robotë humanoidë dykëmbësh.
E themeluar në vitin 2016 dhe me seli në Hangzhou, Unitree është shndërruar në një nga prodhuesit kryesorë në botë të robotëve autonomë humanoidë dhe katërkëmbësh.
Prezantimi i robotit të ri vjen pak para ofertës fillestare publike të aksioneve (IPO) të kompanisë, e planifikuar për të mërkurën në tregun teknologjik STAR Market të Bursës së Shangait.
