Shtetet e Bashkuara kanë vendosur sanksione ndaj disa individëve dhe entiteteve që, sipas Departamentit amerikan të Shtetit, janë pjesë e rrjeteve transnacionale të terrorizmit të ekstremit të majtë.
Mes subjekteve të sanksionuara është edhe Autistici/Inventati (A/I Collective), një grup me bazë në Itali, të cilin autoritetet amerikane e akuzojnë se ofron infrastrukturë dixhitale për qeliza të Antifa-s dhe rrjete të tjera radikale të së majtës në SHBA, Evropë dhe vende të tjera.
Sipas SHBA-së, shërbimet e grupit përdoren për organizim, rekrutim dhe komunikim, si dhe për shpërndarjen e informacionit mbi objektivat, manualeve taktike dhe deklaratave të grupeve militante.
Në listën e sotme të sanksioneve janë përfshirë gjithashtu Palestine Action dhe Masar Badil, ndërsa janë sanksionuar edhe Rawa Alsagheer dhe Zaid Abdulnasser, të cilët SHBA i identifikon si drejtues ose zyrtarë të Masar Badil.
Masar Badil është përcaktuar si subjekt i sanksionuar për shkak të lidhjeve me Samidoun Palestinian Prisoner Solidarity Network.
Masat janë ndërmarrë në bazë të Urdhrit Ekzekutiv 13224, i ndryshuar, i cili synon terroristët, organizatat terroriste dhe subjektet që u ofrojnë atyre mbështetje financiare, materiale ose teknologjike.
Sipas autoriteteve amerikane, asetet dhe interesat në prona të subjekteve të sanksionuara që ndodhen nën juridiksionin amerikan bllokohen, ndërsa personat amerikanë përgjithësisht ndalohen të kryejnë transaksione me to.
Departamenti amerikan i Shtetit deklaroi se këto masa janë pjesë e përpjekjeve më të gjera të qeverisë amerikane për të goditur rrjetet ndërkombëtare që, sipas saj, organizojnë, lehtësojnë ose kryejnë akte dhune të lidhura me terrorizmin e ekstremit të majtë.
