Rreth 15 alpinistë dyshohet se janë të zhdukur pas përmbytjeve të menjëhershme që përfshinë pjesë të Kanionit të Madh në Arizona, SHBA.
Sipas Shërbimit të Parqeve Kombëtare të SHBA-së (NPS), përmbytjet goditën rreth orës 14:30 me kohën lokale të shtunën në zonën e Bright Angel Canyon dhe Phantom Ranch.
Deri tani, 62 persona janë evakuuar me helikopter nga zona e prekur, ndërsa operacionet e kërkim-shpëtimit pritet të vazhdojnë. Deri më tani, nuk është raportuar për persona të lënduar. Mes personave të evakuuar ishte edhe Nikki Baggs, 41 vjeçe, e cila ndodhej në fund të Kanionit të Madh së bashku me dy shoqet e saj.
“E gjithë kjo ishte e tmerrshme. Ishte një ditë e bukur dhe më pas njerëzit filluan të bërtisnin dhe të vraponin”, tha Baggs për BBC.
Ajo tregoi se sapo kishte lënë sendet e saj në një kasolle në Phantom Ranch, një zonë e largët në fund të Kanionit të Madh, kur vendosi të dilte së bashku me shoqet për të shijuar ditën.
Situata ndryshoi papritur me fillimin e reshjeve. Baggs dhe shoqet e saj u drejtuan drejt një zone më të lartë, ku u ulën në një tavolinë pikniku. Pak më vonë, rojet e parkut u kërkuan të lëviznin përsëri drejt një terreni më të sigurt.
Ato qëndruan aty për disa orë së bashku me persona të tjerë, përpara se të evakuoheshin me helikopter rreth orës 21:30 me kohën lokale.
Baggs tha se ajo dhe shoqet e saj kishin planifikuar të hanin një darkë në Phantom Ranch, por pas përvojës së frikshme ndiheshin thjesht mirënjohëse që kishin shpëtuar.
Ajo vlerësoi reagimin e shpejtë dhe të koordinuar të rojeve të parkut, duke thënë se ndërhyrja e tyre i bëri të ndiheshin më të sigurta gjatë një situate të pasigurt.
Shërbimi i Parqeve Kombëtare u ka bërë thirrje personave që kanë informacion për alpinistë ose udhëtarë me çanta shpine, të cilët ndodheshin të shtunën në pjesën e brendshme të kanionit, përgjatë korridorit Bright Angel Creek, që të kontaktojnë autoritetet
