Një punonjës i një parku aventurash në Papua Guinenë e Re ka humbur jetën pasi u sulmua nga një krokodil për të cilin kujdesej prej rreth dy vitesh.
Ngjarja ndodhi gjatë ushqyerjes së kafshës në Parkun e Aventurave në Port Moresby.
Sipas dëshmitarëve, punonjësi kishte sjellë një pulë pranë gardhit për të ushqyer krokodilin, kur zvarraniku e kapi nga këmbët dhe tentoi ta tërhiqte në ujë.
Krokodili e mbajti punonjësin për rreth një orë.
Për ta liruar, policia u detyrua të qëllonte kafshën më shumë se 10 herë.
Pas shpëtimit, punonjësi u dërgua me urgjencë në spital, por ndërroi jetë të dielën në mëngjes nga plagët e marra.
Punonjësi kishte rreth dy vite që punonte në park. Aty organizoheshin edhe demonstrime të ushqyerjes së krokodilëve për vizitorët, me punonjësit që afroheshin pranë kafshëve.
Pas ngjarjes, Parku i Aventurave është mbyllur përkohësisht. Autoritetet po shqyrtojnë rrethanat e sulmit dhe masat e sigurisë gjatë trajtimit të kafshëve.
