Në moshën 90-vjeçare, Toshisuke Kanazawa vazhdon të stërvitet pothuajse çdo ditë dhe të marrë pjesë në gara bodybuilding, duke dëshmuar se mosha nuk e ka ndalur pasionin e tij për këtë sport. Bodybuilderi japonez festoi së fundmi 90-vjetorin e lindjes dhe vetëm një ditë më vonë fitoi kategorinë mbi 85 vjeç në Kampionatin Japan Masters Bodybuilding. Kanazawa triumfoi ndaj shtatë konkurrentëve, duke siguruar titullin e 19-të kombëtar në karrierën e tij.
“Jam 100% natyral”, deklaron ai, duke e lidhur fizikun e tij me dekada të tëra stërvitjeje dhe disipline, ndërsa mohon përdorimin e substancave që rrisin performancën. Kanazawa lindi në vitin 1936 në prefekturën Shimane të Japonisë. Në shkollë ishte i apasionuar pas sportit dhe shkëlqeu në garën 1,500 metra stil i lirë, ndërsa ëndërronte të merrte pjesë në Lojërat Olimpike. Një problem muskulor i ndryshoi planet dhe e orientoi drejt bodybuildingut. Për pesë vite me radhë, ai stërvitej deri në gjashtë orë në ditë. Në moshën 24-vjeçare fitoi titullin “Mr. Japan”, ndërsa tre vite më vonë e përsëriti suksesin.
Në vitin 1967, Kanazawa mori pjesë në garën “Mr. Universe” në Montreal, ku konkurroi edhe me emra të mëdhenj të bodybuildingut si Arnold Schwarzenegger dhe Sergio Oliva. Ai u rendit në vendin e katërt. Pas rikthimit në skenën e garave në moshë më të madhe, Kanazawa ka fituar gjithashtu gjashtë kampionate botërore në kategorinë Masters.
Kanazawa ia atribuon jetëgjatësinë dhe formën e tij fizike stilit të jetesës që ka ndjekur për dekada. Ai thotë se nuk ka pirë kurrë duhan apo alkool dhe prej vitesh ka hequr dorë edhe nga mishi dhe peshku. Dieta e tij bazohet kryesisht te orizi kaf, furikake, natto dhe supa miso me vezë të gjalla. Ai konsumon gjithashtu tre shake proteinike në ditë, ndërsa më parë konsumonte gjashtë. Në moshën 90-vjeçare, Kanazawa stërvitet rreth dy orë në ditë, gjashtë ditë në javë. Megjithatë, programi i tij ka ndryshuar me kalimin e viteve. Ai ka reduktuar ushtrimet me pesha dhe shtypjet në stol, duke preferuar pajisjet e palestrës dhe duke i përshtatur ushtrimet me mundësitë e trupit të tij.
“Në këtë moshë bëj atë që është më e mira për veten dhe trupin tim”, shprehet ai, duke pranuar se tani i duhet më shumë kohë për rikuperim dhe se kujdeset të flejë rreth shtatë orë çdo natë. Kanazawa ishte tërhequr nga garat në të 30-at, por u rikthye në të 50-at, i motivuar edhe nga dëshira për t’i dhënë kurajë bashkëshortes së tij, e cila po përballej me probleme kronike shëndetësore. “Doja t’i tregoja asaj se gjithçka është e mundur”, ka treguar ai. Shtatë vite pas rikthimit, ai fitoi vendin e parë në një turne Masters.
Sot, në një Japoni ku popullsia e moshuar përbën një pjesë të madhe të shoqërisë, Kanazawa dëshiron të përcjellë mesazhin se mosha nuk duhet të jetë arsye për të hequr dorë nga aktivitetet dhe pasionet. “Shqetësohem se shumë të moshuar po heqin dorë nga gjërat që bënin kur ishin më të rinj”, thotë ai. Por për 90-vjeçarin japonez, duket se nuk ka një moshë përfundimtare për bodybuildingun. “Dua të jem bodybuilder deri në ditën që të vdes”, shprehet Kanazawa.
