Manchester United vazhdon me rezultate zhgënjyese në Premierligë, pasi të shtunën barazoi 1:1 me Tottenhamin në “Old Trafford”, duke regjistruar startin më të dobët të sezonit në kampionat që nga edicioni 1986/87.
Skuadra e Michael Carrickut ka grumbulluar vetëm gjashtë pikë në gjashtë ndeshjet e para, me një fitore, tri barazime dhe dy humbje.
Edhe pse Tottenham ndodhej në fund të tabelës para kësaj ndeshjeje dhe ende nuk ka fitore në kampionat, United nuk arriti ta shfrytëzonte as epërsinë numerike në fushë.
Pjesa e parë në “Old Trafford” ishte zhgënjyese për vendasit, të cilët patën vështirësi të krijonin raste të rrezikshme, ndërsa Tottenham ishte më kërkues dhe shpërdoroi disa mundësi për të kaluar në epërsi.
United kaloi në avantazh në minutën e 73-të, kur Bryan Mbeumo realizoi pas asistimit të Matheus Cunhas. Pesë minuta më vonë, Rodrigo Bentancur u përjashtua me karton të kuq pas një përplasjeje me Luke Shaw, duke e lënë Tottenhamin me dhjetë lojtarë.
Megjithatë, në vend që ta mbyllte ndeshjen, United lejoi kundërshtarin të rikthehej.
Dominic Solanke shënoi në minutën e 90+2-të, duke i siguruar Tottenhamit një pikë dhe duke shkaktuar pakënaqësi te tifozët vendas.
Sipas Reuters, United ka dështuar të fitojë në tri ndeshjet e fundit të kampionatit në të cilat kundërshtari ka marrë karton të kuq.
Kjo e bën edhe më shqetësues faktin se skuadra nuk po arrin të menaxhojë ndeshjet në të cilat ka avantazh.
Trajneri Michael Carrick nuk e fshehu pakënaqësinë pas ndeshjes, duke pranuar se pikët e grumbulluara deri tani nuk janë të mjaftueshme.
“Jam shumë i zhgënjyer me rezultatin. Ishte një paraqitje e përzier. Nuk jam i kënaqur me numrin e pikëve që kemi deri tani”, deklaroi Carrick, sipas The Guardian.
Ai shtoi se skuadra duhet të ndryshojë drejtim sa më shpejt, ndërsa pranoi se reagimi negativ i tifozëve në tribuna e kishte prekur.
“Kur gjërat nuk shkojnë sipas planit, e kuptoj reagimin. Natyrisht, dhemb shumë”, u shpreh trajneri.
Në anën tjetër, trajneri i Tottenhamit, Roberto De Zerbi, vlerësoi reagimin e skuadrës së tij, veçanërisht pas përjashtimit të Bentancurit.
“Jam shumë i lumtur, sepse pashë shpirtin dhe karakterin e duhur”, tha De Zerbi për Sky Sports.
Tottenhami mbetet pa fitore pas gjashtë xhirove dhe ka vetëm tri pikë, por barazimi në “Old Trafford” i dha një sinjal pozitiv trajnerit italian.
Për Manchester Unitedin, ndërkohë, presioni mbi Carrickun pritet të rritet.
Me vetëm një fitore në gjashtë ndeshje dhe me pikë të humbura edhe përballë një kundërshtari me dhjetë lojtarë, skuadra duhet të reagojë shpejt për të mos e thelluar krizën në fillim të sezonit.
