Cristiano Ronaldo po vazhdon të shkruajë histori në Arabinë Saudite.
Ylli portugez i Al-Nassr është vetëm një hap larg rekordit të golashënuesit më të mirë të klubit në epokën profesionale të kampionatit saudit, të cilin aktualisht e ndan me legjendën Mohammed Al-Sahlawi.
Ronaldo e arriti këtë shifër pas golit të shënuar në fitoren 4:0 ndaj Al-Riyadhit, duke e barazuar rekordin prej 103 golash të Al-Sahlawit në kampionat me fanellën e Al-Nassr.
Tashmë, portugezit i duhet vetëm një gol për të mbetur i vetëm në krye të kësaj liste dhe për të vendosur një tjetër rekord në karrierën e tij të jashtëzakonshme, shkruan “Tuttomercatoweb”.
Hamdallah mbetet një tjetër objektiv
Ronaldo po i ndjek edhe arritjet e sulmuesit maroken Abderrazak Hamdallah, njëri prej golashënuesve më të spikatur në historinë e futbollit saudit.
Hamdallah i ka vendosur disa rekorde në kampionat, ndërsa Ronaldo vazhdon ta ngushtojë distancën falë paraqitjeve të tij me Al-Nassr.
Portugezi, i cili është ndër emrat më të mëdhenj të futbollit botëror, synon të vazhdojë të thyejë rekorde edhe në këtë fazë të karrierës.
Çdo gol i tij tashmë ka peshë të veçantë në historinë e klubit dhe të kampionatit saudit.
Ish-futbollisti i Sporting Lisbonës, Manchester Unitedit, Real Madridit dhe Juventusit i ka realizuar në total 981 gola në karrierë.
