Një nga figurat më të njohura të televizionit britanik, Maya Jama, ka njoftuar largimin nga emisioni i njohur i takimeve “Love Island”, pas nëntë sezonesh si prezantuese.
Prezantuesja 32-vjeçare e bëri të ditur vendimin përmes një deklarate të publikuar në Instagram të dielën, duke e cilësuar përvojën si një periudhë të paharrueshme dhe të mbushur me momente të veçanta.
Maya Jama mori drejtimin e spektaklit të njohur të ITV2 në janar të vitit 2023, duke zëvendësuar Laura Whitmore, dhe që atëherë është shndërruar në një nga yjet më të kërkuara të televizionit britanik.
Njoftimi i saj vjen vetëm një javë pasi ajo arriti në finalen e edicionit të këtij viti të spektaklit “Celebrity Traitors”. Së fundmi, ajo bëri edhe debutimin e saj si aktore në serialin e suksesshëm të Netflix, “The Gentlemen”, me regji të Guy Ritchie.
Në deklaratën e saj, Jama u shpreh se çdo gjë e bukur e ka një fund dhe se ndihet mirënjohëse për këtë përvojë, por tashmë dëshiron t’i përkushtohet projekteve të reja.
Krahas një videoje me momentet më të bukura nga spektakli, ajo shkroi se kishte kaluar një periudhë të jashtëzakonshme, të cilën ishte e vështirë ta përshkruante me fjalë apo ta përmblidhte në një video.
“Ka qenë një epokë e mrekullueshme dhe një kohë e paharrueshme, por, siç ndodh me të gjitha gjërat e bukura, edhe kjo duhet të marrë fund. Ka ardhur koha ime të largohem nga roli i prezantueses së ‘Love Island’”, bëri të ditur ajo.
