Qindra imazhe i janë shtuar Fototekës së pasur të Drejtorisë së Përgjithshme të Arkivave (DPA).
Në një ceremoni dhurimi, Drejtori i Përgjithshëm i Arkivave në detyrë, Endrit Musaj ka nënshkruar një marrëveshje me fotografen daneze, Janne Klerk, e cila dorëzoi pranë DPA-së 44 fotografi të shkrepura në qytete të ndryshme të Shqipërisë, përgjatë janarit të vitit 1994.
Me rastin e kësaj marrëveshjeje, Janne Klerk kreu edhe një vizitë në “dhomën e fortë”, ku ruhet koleksioni i Kodikëve.
Precedenca e dhurimeve ka dëshmuar se materialet dokumentare dhe fotografike të marra në dorëzim prej DPA-së, kanë shërbyer për pasurimin e fondeve, duke ofruar edhe shtysa për nisjen e hulumtimeve të reja. Drejtoria e Përgjithshme e Arkivave falenderoi fotografen daneze për besimin dhe vlerësimin, si rojtare e kujtesës kolektive. /atsh/
