Një grup ndërkombëtar fizikanësh, i udhëhequr nga Instituti i Kozmologjisë dhe Gravitetit në Universitetin e Portsmouth-it, ka propozuar një teori të re që sfidon Big Bengun. Sipas saj, universi ynë nuk lindi nga një pikë e vetme e pafundme, por u krijua pas një kolapsi gravitacional gjigant që formoi një vrimë të zezë.
Teoria e re, e quajtur “Universi-Vrimë e Zezë”, sugjeron se materia u shtyp brenda kësaj vrime, derisa energjia e akumuluar shkaktoi një rikthim, një “kërcim”, i cili krijoi universin tonë në zgjerim.
Sipas profesorit Enrique Gaztañaga, ky kërcim nuk është vetëm i mundur, por i pashmangshëm në kushte të caktuara. Ajo që del pas këtij kërcimi është një univers shumë i ngjashëm me tonin. Madje, zgjerimi i shpejtë nuk ka nevojë për ndonjë fushë hipotetike – ai shkaktohet natyrshëm nga vetë fizika e kërcimit.
Kjo teori eliminon nevojën për një singularitet dhe pajtohet me të dyja: teorinë e përgjithshme të relativitetit dhe mekanikën kuantike. Ndryshe nga parashikimet e Stephen Hawking-ut dhe Roger Penrose-it, që besonin se materia mund të ngjishet pafundësisht, kjo teori mbështetet në kufijtë e vendosur nga fizika kuantike mbi densitetin e materies.
Sipas kësaj teorie, kufiri i universit tonë është horizonti i ngjarjes së një vrime të zezë, aty ku drita nuk mund të arratiset. Kjo e bën të pamundur për ne të shohim “universin prind” nga i cili kemi ardhur. Po ashtu, sugjerohet që çdo vrimë e zezë mund të përmbajë një univers të ri të padukshëm.
Interesi për këtë ide është ringjallur falë vëzhgimeve të teleskopit James Webb. Në mars 2025, ai zbuloi se shumica e galaktikave të hershme rrotullohen në një drejtim të caktuar, një anomali që mund të shpjegohet nëse universi lindi me një rrotullim, si pasojë e krijimit brenda një vrime të zezë.
