Një 57-vjeçar është arrestuar në pikën kufitare të Rinasit, ndërsa tentonte të hynte në territorin e Republikës së Shqipërisë, ndonëse ishte shpallur në kërkim nga autoritetet ligjzbatuese.
Shtetasi Gëzim Stërkeshi, i dyshuar si pjesëtar i një grupi të strukturuar kriminal, ishte në kërkim për veprën penale “Kontrabanda me mallra për të cilat paguhet akcizë”, e kryer në kuadër të një grupi të organizuar.
Arrestimi u bë i mundur falë intervistimeve të detajuara të kryera nga Policia Kufitare e Rinasit, në bashkëpunim me Sektorin për Hetimin e Krimit Ekonomik e Financiar në Departamentin e Policisë Kriminale.
Pas verifikimeve, rezultoi se ndaj 57-vjeçarit ishte caktuar masa e sigurisë “Arrest në burg” nga Gjykata e Posaçme kundër Korrupsionit dhe Krimit të Organizuar (GjKKO).
Specialistët për Hetimin e Krimeve Ekonomike ekzekutuan menjëherë vendimin gjyqësor, ndërkohë që materialet procedurale i janë referuar SPAK-ut për veprime të mëtejshme.
