Nga parketet e NBA-së në fushat e futbollit. Pavel Podkolzin, gjiganti rus me gjatësi 2 metra e 26 centimetra, ka bërë debutimin e tij zyrtar në Kupën e Rusisë me fanellën e Amkal Moskës, duke vendosur një rekord të veçantë: ai është tashmë futbollisti më i gjatë i të gjitha kohërave, vetëm pak centimetra më i shkurtër se lartësia e portës.
Nga parketet e basketbollit te tapeti i gjelbër
Podkolzin, i cili e nisi karrierën e tij në basketboll me ekipin e qytetit të lindjes, Sibirtelecom Lokomotiv, u bë i njohur për fizikun e tij imponues. Pas një eksperience në Itali me Varese (2002-2004), në vitin 2004 ai u zgjodh në Draftin e NBA-së nga Utah Jazz me pick-un e 21-të dhe vetëm një vit më pas debutoi me Dallas Mavericks.
Në NBA, megjithatë, karriera e tij nuk shkëlqeu: vetëm 6 paraqitje, rreth 30 minuta në parket dhe 4 pikë të shënuara.
Në vitin 2006, pas një rënieje të dukshme të formës, Podkolzin u largua nga liga më prestigjioze e basketbollit për t’u rikthyer në Rusi, duke humbur gradualisht skenën ndërkombëtare.
Debutimi në futboll, sulmues i qendrës në moshën 40-vjeçare
Në moshën 40-vjeçare, Podkolzin ka vendosur t’i japë një kthesë të papritur karrierës së tij sportive, duke u bërë sulmues qendre në futboll. Amkal Moska i ofroi mundësinë për të debutuar në Kupën e Rusisë, ndeshje që përfundoi me fitoren 1-0 ndaj FC Kaluga. Edhe pse nuk arriti të shënonte në ndeshjen e parë, prania e tij në fushë u bë menjëherë virale.
“I jam shumë mirënjohës kësaj mundësie për të provuar një sport kaq ndryshe,” – u shpreh Podkolzin pas ndeshjes për Baja News. – “Jam duke luajtur në një kompeticion të rëndësishëm dhe kjo është fantastike. Goli? Do të vijë, kishin një portier të mirë. Do të përpiqem në ndeshjen e radhës.”
Me gjatësi 2.26 m, Podkolzin nuk është vetëm lojtari më i gjatë në fushë, por edhe futbollisti më i gjatë në histori. Tifozët e Amkal tashmë presin që gjiganti rus të shënojë golin e tij të parë dhe të bëhet protagonist në ekipin e tyre.
