Papa Leo fillimisht fitoi simpatinë e katolikëve konservatorë pas zgjedhjes së tij në maj, duke përqafuar tradita të lëna pas dore nga pararendësi i tij, Papa Françesku, dhe duke shmangur çështjet sociale të nxehta që kishin ndarë Kishën me 1.4 miliardë besimtarë.
Por muaji i mjaltit me konservatorët duket se ka marrë fund, pasi ai papritur kritikoi politikat e ashpra të emigracionit të presidentit amerikan Donald Trump, duke vënë në dyshim nëse ato janë në përputhje me mësimet pro-jetës së Kishës.
“Dikush që thotë jam kundër abortit, por jam dakord me trajtimin çnjerëzor të emigrantëve në Shtetet e Bashkuara, nuk e di nëse mund të quhet pro-life,” tha Papa Leo, papa i parë amerikan, për gazetarët të martën.
Kritikë që më herët e kishin përgëzuar për qëndrimin e matur, shprehën tronditje që Leo kritikoi kampionin aktual të konservatorizmit global. Ish-peshkopi i Teksasit, Joseph Strickland – një kritik i ashpër i Françeskut, i shkarkuar nga detyra nga papa i ndjerë, por që kishte lavdëruar Leon – e akuzoi atë në rrjetet sociale për “shumë konfuzion … mbi shenjtërinë e jetës njerëzore dhe qartësinë morale të mësimeve të Kishës”.
“Jam i lodhur nga intervistat papnore. Ai duhet të kthehet te heshtja e mëparshme,” shkroi blogu Rorate Caeli, që dikur kishte kritikuar Françeskun dhe kishte lavdëruar Leon.
Administrata Trump, e cila kishte qenë shumë kritike ndaj Françeskut por rrallë ishte shprehur për Leon, reagoi gjithashtu. Zëdhënësja Karoline Leavitt tha se ajo e hodhi poshtë karakterizimin për trajtim çnjerëzor të emigrantëve.
Papa nuk do të ndalet nga kritikat
Zyrtarë të Vatikanit dhe bashkëpunëtorë të papës thanë se Leo ka një ndjeshmëri të veçantë për trajtimin e emigrantëve dhe nuk ka gjasa të tërhiqet nga kritikat. Por kjosfidon konservatoret, mund të dëmtojë misionin e tij, të shprehur gjatë meshës së parë si papë, për të punuar për unitetin e një Kishe botërore gjithnjë e më të polarizuar.
Edhe pse Leo, nga natyra i kujdesshëm, do të përpiqet të shmangë përplasjet e shpeshta me konservatorët që mund të forcojnë kundërshtimin ndaj axhendës së tij, ai nuk do të heqë dorë nga vlerat e veta.
“A do t’u prishë punë konservatorëve amerikanë në disa raste? Po,” tha Elise Allen, autore e një biografie për Leon për Penguin Peru dhe e vetmja gazetare që e ka intervistuar që pas zgjedhjes së tij. “Nuk duhet të habiten që ai e bën këtë.”
Kardinali Michael Czerny, këshilltar i lartë si i Françeskut, ashtu edhe i Leos, tha se papa i ri po ndiqte udhëzimin e Shën Palit, udhëheqës i krishterimit të shekullit të parë: “Predikoje fjalën, bëhu i gatshëm në kohë dhe jashtë kohe.”
“(Leo) inkurajon dhe sfidon çdo Kishë lokale dhe çdo të krishterë, përballë çështjeve të ndërlikuara dhe urgjente, të jetojnë Ungjillin,” tha kardinali për Reuters.
