Legjenda e Liverpool-it, Steven Gerrard, ka zbuluar kundërshtarët e tij më të vështirë. Ish-mesfushori ka pasur një karrierë të suksesshme, duke u bërë një nga lojtarët më ikonikë në historinë e “Reds”.
Gerrard foli me ESPN rreth lojtarëve që ai i konsideron si më të vështirët me të cilët është përballur gjatë kohës së tij si lojtar. Ai menjëherë emëroi tre mesfushorë legjendarë të Premier League, duke theksuar se secili prej tyre ishte i vështirë për një arsye të ndryshme.
Anglezi emëroi legjendën e Chelsea-t, Claude Makelele, legjendën e Manchester United, Roy Keane, dhe legjendën e Arsenal-it, Patrick Vieira, si kundërshtarët më të vështirë me të cilët është përballur.
Makelele ishte pjesë e skuadrës së famshme të Chelsea-t që pësoi vetëm 15 gola në sezonin 2004-05, dhe ishte aq i mirë saqë një rol mori emrin e tij. Gerrard theksoi inteligjencën dhe disiplinën e tij në mesfushë si arsyen pse ishte e vështirë të luaje kundër tij.
Me Keane, Gerrard zbuloi se intensiteti i tij në fushë ishte ajo që e bënte atë një kundërshtar kaq të vështirë. Irlandezi ishte i zjarrtë në fushë dhe tregonte agresivitet të madh në përpjekjen për të dalë në krye në betejat në mesfushë.
Në mënyrë të ngjashme, Gerrard e quajti Vieira si një nga mesfushorët më të kompletuar me të cilët është përballur ndonjëherë në karrierën e tij. Ai theksoi se forca, teknika dhe qëndrueshmëria e francezit e bënë përballjen me të një detyrë të vështirë.
Pavarësisht se u përball me Cristiano Ronaldo-n dhe Lionel Messi-n për disa vite në vitet 2000, Gerrard nuk i përzgjodhi mes kundërshtarëve të tij më të vështirë.
Ai luajti kundër portugezit në 13 raste për klubin dhe Anglinë, dhe u përball me Lionel Messin vetëm dy herë në Champions League.
