Hulumtime të reja sugjerojnë mundësinë e ekzistencës së një planeti të panjohur më parë në sistemin tonë diellor – të quajtur Planeti Y. Ky trup qiellor mund të jetë një kandidat alternativ për “Planetin e Nëntë”, ndoshta madje edhe planetin e dhjetë, nëse ekziston paralelisht me planetin hipotetik X, për të cilin astronomët kanë kërkuar për afro një dekadë.
Sipas studimit të publikuar së fundmi dhe të raportuar nga RTS dhe CNN, Planeti Y mund të jetë afërsisht sa madhësia e Tokës, më i vogël dhe më afër se Planeti X, i cili mendohet të jetë një gjigant gazi shumë herë më masiv se planeti ynë.
Si u arrit në këtë përfundim
Një ekip shkencëtarësh analizoi orbitat e 50 objekteve të Rripit Kuiper (KBO) dhe vuri re se ato janë të pjerrëta rreth 15 gradë krahasuar me planin e zakonshëm të tetë planetëve të njohur. Sipas tyre, kjo devijim mund të shpjegohet vetëm nga ndikimi gravitacional i një planeti të fshehur.
“Ky punim nuk përfaqëson zbulimin e një planeti, por sigurisht që përfaqëson zbulimin e një enigme, zgjidhja më e mundshme e të cilit është një planet,”
— tha astrofizikani Amir Siraj nga Universiteti Princeton, autori kryesor i studimit.
Bazuar në llogaritjet e ekipit, Planeti Y mund të jetë një planet shkëmbor, me masë ndërmjet Mërkurit dhe Tokës, dhe të orbitonte 100–200 herë më larg se Toka nga Dielli. Kjo është dukshëm më afër se distanca e parashikuar për Planetin X, që mendohet të jetë rreth 400 njësi astronomike (AU) larg.
Skepticizëm dhe pritshmëri
Jo të gjithë astronomët janë të bindur. Samantha Lawler nga Universiteti i Reginës (Kanada) e quajti studimin “jo përfundimtar”, për shkak të numrit të kufizuar të objekteve të analizuara. Edhe Patrick Sofia Lykavka nga Universiteti Kindai (Japoni) pranoi se planeti është “i mundshëm”, por kërkohen më shumë vëzhgime për konfirmim.
Roli i observatorit Vera Rubin
Shpresa më e madhe për zbulimin e këtij planeti është Observatori Vera C. Rubin në Kili, i cili sapo ka nisur operacionet me kamerën dixhitale më të madhe në botë. Ky observator pritet të zbulojë mijëra objekte të reja të Rripit Kuiper në tre vitet e ardhshme.
“Mendoj se gjatë dy deri në tre viteve të para të misionit të observatorit, gjithçka do të bëhet e qartë. Nëse Planeti Y është aty, do ta gjejmë,”
— shtoi Siraj.
Nëse brenda kësaj periudhe nuk gjenden prova për Planetin Y apo X, shumë ekspertë besojnë se të dyja hipotezat mund të hidhen poshtë përfundimisht.
